Erion Veliaj sot para Apelit të Posaçëm, kërkon zëvendësimin e masës “arrest me burg”

Kryetari i Bashkisë së Tiranës, Erion Veliaj, do të dalë sot në orën 14:00 para Gjykatës së Apelit të Posaçëm me kërkesën për zëvendësimin e masës së sigurisë “arrest me burg”.

Përmes avokatëve të tij, Veliaj kërkon një masë më të butë sigurie, ndërsa seanca do të zhvillohet nën drejtimin e gjyqtarit Engert Pëllumbi.

Seanca e sotme vjen pas ankimit të vendimit të 23 prillit, kur gjyqtari Erion Bani vendosi të mbajë në fuqi masën e arrestit, duke u bazuar në raportin e përditësuar të SPAK mbi vijimin e hetimeve. Avokatët e Veliajt pretendojnë se nuk ekzistojnë më kushtet ligjore për mbajtjen në burg dhe kërkojnë lirimin e tij.

Ndërkohë, një rekurs i veçantë është dërguar edhe në Gjykatën e Lartë, ku pritet shqyrtimi i masës së sigurisë. Deri tani nuk është caktuar data apo trupa gjykuese që do merret me çështjen.