Greqia partneri i tretë tregtar, eksportet arritën 8,5 miliardë lekë
Greqia është renditur e 3-ta në partnerët kryesorë tregtarë të Shqipërisë për katërmujorin e vitit 2025.
Sipas treguesve të publikuar nga Instituti i Statistikave (INSTAT), vëllimi i përgjithshëm i tregtisë së jashtme me këtë vend përbën 7,4% të totalit, duke shënuar një rritje prej 9,3% krahasuar me të njëjtën periudhë të vitit të kaluar, një tregues pozitiv për intensifikimin e marrëdhënieve ekonomike midis dy vendeve.
Eksportet shqiptare drejt Greqisë arritën në 8,5 miliardë lekë, ku një pjesë e konsiderueshme përbëhet nga tekstilet dhe këpucët, që kapin vlerën e 3 miliardë lekëve, duke treguar rëndësinë e këtij sektori në tregtinë me vendin fqinj.
Gjithashtu, eksportet e materialeve ndërtimore dhe mineraleve, lëndëve djegëse dhe energjisë elektrike, me vlerë përkatësisht 229 milionë dhe 1 miliard lekë, theksojnë diversifikimin e produkteve shqiptare që hyjnë në tregun grek.
Nga ana tjetër, importet nga Greqia janë dukshëm më të larta, duke arritur në 23,3 miliardë lekë, me peshën kryesore të ushqimeve, pijeve dhe duhanit që arrijnë në 6,4 miliardë lekë.
Importet e mineraleve dhe lëndëve djegëse, si dhe të produkteve kimike dhe plastikës, janë gjithashtu të konsiderueshme, duke reflektuar nevojat e industrisë dhe konsumit në Shqipëri.
Fraksion.com
