FBI thotë se tetë veta u plagosën në Kolorado nga i dyshuari që bërtiti “Liri për Palestinën”

Tetë persona janë plagosur të dielën në Shtetet e Bashkuara, kur një burrë 45-vjeçar bërtiti “Liri për Palestinën” dhe hodhi pajisje ndezëse ndaj një turme në Bolder të Kolorados, ku po mbahej një demonstratë në kujtim të pengjeve izraelite që vazhdojnë të mbahen në Gazë, thanë autoritetet amerikane.

Katër gra dhe katër burra, të moshave ndërmjet 52 dhe 88-vjeçare, janë dërguar në spitale, ka bërë të ditur policia në Bolder. Autoritetet më herët kishin thënë se gjashtë persona ishin plagosur, prej të cilëve njëri ndodhej në gjendje kritike.

“Si rezultat i këtyre fakteve preliminare, është e qartë se ky është akt i shënjuar dhune, dhe FBI po e heton këtë si akt terrorizmi”, tha agjenti special i Byrosë Federale amerikane të Hetimeve (FBI), Mark Michalek, i cili udhëheq operacionet në Denver.

Michalek e identifikoi të dyshuarin si Mohamed Soliman, i cili është shtruar në spital menjëherë pas sulmit, raporton Reuters.

Drejtori i FBI-së, Kash Patel, po ashtu e ka përshkruar incidentin si “sulm të shënjuar terrori”, ndërsa kryeprokurori i Kolorados, Phil Weiser, tha se duket se bëhet fjalë për “krim të urrejtjes, duke marrë parasysh grupin që ishte në shënjestër”.

Shefi i policisë në Bolder, Stephen Redfearn, tha se nuk beson se ka pasur të përfshirë të tjerë.

“Jemi mjaft të sigurt se kemi të dyshuarin e vetëm në arrest”, u shpreh ai.

Sulmi ndodhi në Pearl Street Mall, një qendër e popullarizuar tregtare pranë Universitetit të Kolorados, gjatë një ngjarjeje të organizuar nga Run For Their Lives, një organizatë e përkushtuar për të tërhequr vëmendje për pengjet e rrëmbyera pas sulmit të 2023-tës ndaj Izraelit nga Hamasi, grupi palestinez i shpallur terrorist nga SHBA-ja dhe Bashkimi Evropian.

Nëpërmjet një deklarate, grupi tha se që atëherë janë zhvilluar marshe për pengjet çdo javë, “pa ndonjë incident të dhunshëm deri më sot”.

Kryeministri i Izraelit, Benjamin Netanyahu, tha nëpërmjet një komunikate se viktimat u sulmuan “thjesht sepse ishin hebrenj”, dhe se besonte se autoritetet amerikane do ta vinin para përgjegjësisë “keqbërësin gjakftohtë”.

“Sulmet antisemite nëpër botë janë rezultat i drejtpërdrejtë i shpifjeve kundër shtetit dhe popullit hebraik, dhe kjo duhet të ndalet”, u shpreh ai.

Incidenti ndodhi në mes të tensioneve të rritura në SHBA për shkak të luftës së Izraelit në Gazë, e cila ka nxitur shtim të krimeve urrejtëse antisemtike dhe hapa nga mbështetësit konservatorë të Izraelit, të udhëhequr nga presidenti Donald Trump, për t’i cilësuar protestat propalestineze si antisemite.

Administrata e Trumpit ka arrestuar protestues kundër luftës pa akuza, dhe ka ndërprerë financimin e universiteteve elitare amerikane të cilat kanë lejuar demonstrata të tilla.

Nëpërmjet një postimi në rrjetin social X, zëvendësshefi i stafit të Trumpit, Stephen Miller, tha se i dyshuari, Soliman, ka qëndruar në SHBA përtej afatit të vizës së tij, dhe ishte lejuar të punonte nga administrata e mëparshme. Ai tha se kjo është dëshmi e mëtejme e nevojës për “rishikim të plotë” të asaj që ai e përshkroi si “emigrim vetëvrasës”.

Departamenti për Siguri të Brendshme i SHBA-së ka thënë se do të prezantojë më shumë informata për të dyshuarin sapo ato të jenë në dispozicion./REL

Fraksion.com