“Në rrezik procesi zgjedhor”, PD letër KQZ dhe misionit të OSBE: Shkelje dhe presion politik mbi votën e diasporës! Kërkesë për hetim nga SPAK

Partia Demokratike ka ngritur alarmin për rrezikimin e integritetit të procesit zgjedhor në kuadër të votës së diasporës për zgjedhjet e 11 majit, duke dërguar një letër drejtuar Komisionit Qendror të Zgjedhjeve dhe për dijeni të misionit të OSBE-ODIHR në Shqipëri për vëzhgimin e procesit elektoral.

Në letrën e tyre, demokratët kanë paraqitur një sërë rastesh të dokumentuara, të cilat sipas tyre dëshmojnë për parregullsi në këtë proces.

PD thekson rëndësinë e hetimit të këtyre pretendimeve për të garantuar integritetin e procesit zgjedhor dhe votën e çdo qytetari shqiptar, pavarësisht vendbanimit të tij. Sipas PD shkeljet më të rënda janë regjistruar në Greqi.

“Procesi i votimit të diasporës për zgjedhjet e 11 majit 2025 është shoqëruar me probleme të shumta që rrezikojnë seriozisht integritetin e procesit zgjedhor. Shkeljet më të rënda janë regjistruar në Greqi, ku jeton pjesa më e madhe e emigrantëve shqiptarë, por probleme serioze janë verifikuar edhe në Itali, Gjermani, SHBA, MB (UK) dhe vende të tjera të BE-së. Shkeljet variojnë nga mungesa e transparencës procedurale, tek presioni politik, shpërndarja jozyrtare e fletëvotimeve dhe cënimi i fshehtësisë së votës etj”, theksohet në shkresë.

Pritet që institucionet përgjegjëse të shqyrtojnë pretendimet dhe të marrin masat e nevojshme nëse konstatohen shkelje.

Kësisoj, Partia Demokratike ka kërkuar një audit të gjithë logjistikës së votës së diasporës, rishikim për pavlefshmëri të çdo vote të dorëzuar, hetim penal nga ana e SPAK për blerje të votave dhe përfshirje të Partisë Socialiste në shpërndarjen e tyre si edhe një dërgim të një misioni të OSBE-ODIHR në qendrat e diasporës në Greqi mes të tjerash. Lexoni dokumentin e plotë

Fraksion.com