Berisha prezanton kandidatët e PD në Vorë: Familja shqiptare ka nevojë për mbështetje që të mos e braktisë vendin

Kryetari i Partisë Demokratike, Sali Berisha, ka marrë pjesë në prezantimin e kandidatëve të PD dhe të koalicionit “Aleanca për Shqipërinë Madhështore” në Vorë, ku theksoi rëndësinë e rikthimit të fokusit tek familja shqiptare dhe mbështetja ekonomike për të gjitha brezat.

Në fjalën e tij, Berisha u ndal tek sfidat sociale dhe ekonomike me të cilat përballen qytetarët, duke i cilësuar ato si pasojë e keqqeverisjes aktuale.

“Familja shqiptare ka nevojë të mbështetet ekonomikisht që pensionistin që ka në varësi mos ta ketë barrë. Familja ka nevojë që vajza dhe djali i saj të mos marrin rrugët sepse sofra nuk i mban më, por të shkollohen, të punësohen dhe të ndërtojnë ëndrrën e tyre këtu, në vendin e tyre,” tha Berisha.

Ai u bëri thirrje qytetarëve të mos dorëzohen përballë vështirësive dhe të besojnë se ndryshimi është i mundur me votë. Sipas tij, koalicioni opozitar ofron një alternativë reale për të ndalur emigrimin masiv dhe për të garantuar mirëqenie dhe shpresë për çdo familje shqiptare.

Berisha e mbylli fjalimin duke theksuar se zgjedhjet e 11 majit janë një mundësi për të “rikthyer shpresën në sofrat shqiptare” dhe për të ndërtuar një të ardhme më të drejtë dhe të barabartë.

Fraksion.com