JD Vance kalon Pashkët në Romë dhe takohet me Melonin
Zëvendëspresidenti i SHBA, JD Vance do të vizitojë sot Italinë duke kaluar fundjavën e festave të Pashkëve me familjen e tij në Romë dhe Vatikan, si pjesë e një udhëtimi njëjavor që i çon ata edhe në Indi.
Vance do të jetë në Itali, ndërsa tensionet mbi tregtinë dhe lufta në Ukrainë gërryejnë lidhjet transatlantike.
Vizita e tij do të përfshijë një takim me kryeministren italiane Giorgia Meloni, e cila po kthehet nga bisedimet me presidentin Donald Trump në Uashington.
Të dielën e Pashkëve, Vance është planifikuar të marrë pjesë në Meshën në Bazilikën e Shën Pjetrit.
Ka zëra se Vance mund të takohet edhe me papa Françeskun.
Papa ka kufizuar angazhimet e tij publike pas një periudhe të rëndë pneumonie që e vendosi atë në spital për pesë javë.
Megjithatë, ai mund të bashkohet me një takim të planifikuar midis Vance dhe Sekretarit të Shtetit të Vatikanit, kardinalit Pietro Parolin.
Françesku ka kritikuar politikat e dëbimit masiv të Trump dhe u bëri thirrje katolikëve – mes tyre Vance – të mbështesin dinjitetin e të gjithë njerëzve.
Vance nuk e ka fshehur kritikën e tij për liderët evropianë, duke i akuzuar ata për kursim në mbrojtje dhe hapjen e kufijve të tyre.
Në një fjalim tashmë famëkeq në Mynih në shkurt, ai kritikoi komisarët e BE-së për shtypjen e fjalës së lirë dhe paralajmëroi se kërcënimet reale të Evropës vinin nga brenda dhe jo nga Rusia apo Kina.
Pas qëndrimit të tij në Itali, zëvendëspresidenti është planifikuar të udhëtojë në Indi, në fillim të javës së ardhshme.
Fraksion.com
