Kthehet dimri në veri të vendit. Reshje dëbore në disa zona të Pukës dhe Kukësit

Disa nga zonat verilindore të vendit janë përfshirë nga reshjet e dëborës dhe temperaturat e ulëta gjatë ditës së sotme.

Sipas Autoritetit Rrugor Shqiptar, reshje dëbore ka pasur në akset Bogë-Theth, Pukë-Fushë Arrëz, Kukës-Ura Zapodit dhe në Qafë Mali.

Mjetet borëpastruese po punojnë për pastrimin e rrugëve nga dëbora dhe shpërndarjen e kripës, për të patur qarkullim pa probleme të automjeteve.

Drejtuesit e tyre rekomandohet të kenë kujdes për shkak të lagështisë në rrugë, të pajisen me goma dimërore dhe zinxhir kur udhëtojnë për në zonat malore me prezencë dëbore.