Rama: Zhvillim i pronave të ushtrisë duke ndërtuar partneritete, rrit të ardhurat

Kryeministri Edi Rama dhe ministri i Mbrojtjes Pirro Vengu ishin sot në Zall-Herr, në prezantimin e arritjeve dhe sfidave të së ardhmes në fushën e mbrojtjes ndërsa vendi shënon 16-vjetorin e hyrjes në NATO.

Gjatë fjalës së tij kreu i qeverisë theksoi rëndësinë e zhvillimit të pronave të ushtrisë, për të përmirësuar më tej situatën financiare të Forcave të Armatosura.

Kryeministri theksoi se Ministria e Mbrojtjes duhet të bëhet qendër për zhvillimin e këtyre pronave, pasi janë potencial për të shtuar të ardhurat.

“Edhe në aspektin e pronave të ushtrisë të bëjmë një hap të rëndësishëm. Për një kohë shumë të gjatë ushtria shqiptare është zhveshur nga shumë prona në mënyrë spontane në mënyrë kaotike, në mënyrë shpeshherë të pakuptueshme. Ndërkohë që sot e gjithë ditën ushtria shqiptare disponon shumë asete të fjetura të cilat janë aty për inerci që nuk përdoren dhe as nuk vihen në punë, një situatë që ne duhet ta adresojmë”, tha Rama.

“Ministria e Mbrojtjes duhet të bëhet qendër edhe e këtij aspekti, domethënë e zhvillimit të pronave që nuk janë prona që do të përdoren nga Forcat e Armatosura për qëllime ushtarake, por që janë prona të Forcave të Armatosura”, tha Rama.

Sipas Ramës, zhvillimi duhet të vijë duke ndërtuar partneritete dhe jo duke i lëshuar pronat për hiç asgjë, por duke qenë pjesë në këto partneritete edhe në këtë drejtim Ministria e Mbrojtjes dhe Forcat e Armatosura të mund të marrin të ardhura.

“Ushtria sot kërkon shumë para, të gjithë po rrisin buxhetet, por ama nga ana tjetër ky territor, ky sektor, ky drejtim ka potencial për të bërë shumë para për ushtrinë”, theksoi ai.

“Për të qenë të mençur në mënyrën si investojmë taksat e shqiptarëve e për të krijuar një bazë prodhuese e eksportuese dhe një bazë administrimi të burimeve, në mënyrë që të kemi ushtri që të jetë vërtetë në pikë referimi kombëtar. Të jetë një aset i admirueshëm për të gjithë dhe të jetë një hapësirë ku cilido apo cilado të shohë një të ardhme dhe të ketë ambicie të bëhet pjesë e Forcave të Armatosura qoftë në uniformë, qoftë me kapacitete që lidhen me teknologjinë me shumë çka tjetër që vjen nga jeta civile”, theksoi Rama.

Fraksion.com