Rama me shtabin elektoral të njësisë 14: Do heqim taksën për parkimet

Kryeministri, njëherësh kryetari i Partisë Socialiste, Edi Rama dhe drejtuesja politike e Qarkut të Tiranës, ministrja e Arsimit dhe Sportit, Ogerta Manastirliu zhvilluan sot një takim me shtabin elektoral të Njësisë Nr.14.

Rama u ndal tek problematika e parkimeve në këtë zonë dhe në kryeqytet, teksa u shpreh se po punohet për një program në bashkëpunim me bashkinë dhe me Korporatën Shqiptare të Investimeve, (AIC) për të ndërtuar parkime nëntokësore dhe mbitokësore.

Rama shtoi se, për ndërtuesit do të hiqet taksa e ndërtimit të parkimit, duke çuar në rritje të numrit të parkimeve të ndërtuara.

“Kjo zonë në fakt ka nevojë shumë për ndërhyrje se janë bërë shumë ndërtime dhe ka shumë nevojë për ndërhyrje në infrastrukturën e brendshme publike”, tha Rama.

“Edhe çështja e parkimeve është problem dhe po bëjmë një program tani të kombinuar edhe me bashkinë edhe me AIC-në, sepse ka copëza shtet tek-tuk që mund të bëhen një sistem parkimesh publike nën dhe mbitokësor dhe mund të jenë godina të bukura ato se mund të jenë si simbole arkitektonike edhe të mund të lehtësohet kjo çështja e makinave se do shkojë duke u rënduar”, theksoi Rama.

“Edhe në pjesë të caktuara të Tiranës është problem ai parkimi dysh dhe ngadalëson gjithë trafikun. Ndërkohë që do bëjmë dhe diçka tjetër që do t’ia heqim fare taksën e ndërtimit të parkimit. Nëse kalkulimi që është bërë deri më sot është bërë njësoj si ndërton si ndërton dyqan, si ndërton apartament ti paguan të njëjtën taksë dhe kjo edhe e tkurr ndërtuesin tek llogaria. Nëse ia heqim taksën e parkimit dhe do ta heqim, atëherë thjesht do të ketë koston e vetë, por s’do ketë një kosto ekstra me taksa dhe do jenë të nxitur të bëjnë më shumë parkime nëntokësore”, u shpreh Rama.

“Parkimet do të jenë gjithmonë e më shumë fitimprurëse, duhet ta nxisim këtë gjë. Po bëjmë një plan shumë të bukur bashkë me bashkinë dhe AIC-në dhe do shtyjmë në këtë drejtim”, theksoi Rama.

Kandidati për deputet i PS, Plarent Ndreca u shpreh se “kjo zonë ka një specifikë në raport me zonat e tjera duke qenë se ka një zhvillim dinamik të fortë edhe për partinë ka një lëvizje të shpejtë të organizatave. Ne kemi një organizatë në 22 fraksione, këtu punojnë 360 anëtarë për 22 mijë zgjedhës”.

Drejtuesja politike e PS për Tiranën, Ogerta Manastirliu u shpreh se, “struktura është e konsoliduar, tani është fokusi në terren”.

Fraksion.com