“Game Over”, aksion kundër lojërave të fatit në Tiranë, 3 të arrestuar

Policia ka zhvilluar një operacion masiv në Tiranë për goditjen e aktivitetit të paligjshëm të lojërave të fatit.

Në kuadër të operacionit të koduar “Game Over”, policia konstatoi dy subjekte të përshtatura për kryerjen e aktivitetit të paligjshëm të organizimit e lotarive të palejuara (baste sportive online), dhe vuri në pranga 3 shtetas, ndërsa 3 të tjerë u proceduan penalisht.

Sipas policisë “në kuadër të këtij operacionit u arrestuan shtetasit A. S., 24 vjeç, E. K., 40 vjeç dhe S. D., 52 vjeç (organizatorët) si dhe u proceduan penalisht shtetasit Xh. B., 31 vjeç, A. Xh., 26 vjeç dhe M. S., 31 vjeç (administratorë të lokaleve)”.

“Nga veprimet hetimore ka rezultuar se 3 shtetasit e arrestuar në bashkëpunim dhe me administratorët e lokaleve të konstatuara, ushtronin aktivitetin e paligjshëm të lotarive të palejuara, nëpërmjet aparateve celulare”, njoftoi policia.

Materialet procedurale iu referuan Prokurorisë së Tiranës, për veprime të mëtejshme.

Fraksion.com