Berisha: Legalizim para urbanizimit, të gjithë të marrin atë që meritojnë

Kryetari i Partisë Demokratike Sali Berisha zhvilloi sot takime me tregtarë të biznesit të vogël në zonën e tregut të ish-uzinës “Dinamo” në Tiranë.

Gjatë takimit qytetarët i kanë shprehur kryetarit të PD-së, shqetësimet edhe për pronat. Në bashkëbisedim me ta, Berisha, i cili ishte i shoqëruar edhe nga anëtarët e degës nr. 8 të PD, u shpreh se, nuk do të ketë urbanizim pa legalizim përpara, me qëllim që të gjithë të marrin atë që meritojnë.

“E vërteta është se 11 maji për çdo patriot shqiptar është një ditë, as për Sali Berishën, as për partitë, por për Shqipërinë dhe shqiptarët. Ju siguroj se asnjë socialist i ndershëm që do të votojë në 11 maj, për Partinë Demokratike nuk do të jetë i zhgënjyer. Ky program synon një ndryshim madhor në jetën e shqiptarëve pa dallim”, tha Berisha.

Berisha tha se “nuk do të bëjmë urbanizim pa legalizim”.

“Në 8 vite kemi patur vetëm një konflikt në Farkë, çfarë bëmë. I them ministrit se, njerëzve u kemi thënë se, nuk bëjmë urbanizim pa legalizim. Prandaj merr plotësoni legalizimet, ti paguajmë dhe pasi morën paratë nuk bënë asnjë kundërshtim. Mbetën të kënaqur”, u shpreh Berisha.

“Shteti që hyn në konflikt me qytetarët kur ata kanë të drejtë, është zuzar. Në rast se ato rezultojnë të dëmtuara, absolutisht mbi kushte tregu centimetër për centimetër do shpërblehen”, tha Berisha.

Gjatë bisedës me tregtarët e vegjël dhe banorët e zonës, Berisha u shpreh se, “shtëpia” do të pastrohet dhe gjithçka do t’i rikthehet qytetarëve.

“Të gjitha do të rikthehen. Pastrimi i shtëpisë është zotimi ynë”, theksoi Berisha.

Fraksion.com