Berisha: Kontrata me sindikatat brenda 100 ditëve të para të qeverisjes

Kryetari i Partisë Demokratike, Sali Berisha firmosi sot një kontratë bashkëpunimi me Sindikatat e Bashkuara, të përfaqësuara nga Gëzim Kalaja, të cilën siguroi se “do të bëhet realitet brenda 100 ditëve të para të qeverisjes”.

Në fjalën e mbajtur me këtë rast, Berisha siguroi se ajo kontratë do të zbatohet nen për nen dhe pikë për pikë për naftën, minierat dhe metalurgjinë.

“Do zbatohet me një ndjesë publike ndaj jush sepse nuk po kërkoni asgjë tjetër veçse atë që keni merituar që ditën e parë të daljes tuaj në pension. Ndaj dhe kontrata që firmosim sot për pensionin, për amendimet ligjore, për statusin, iu jap fjalën e nderit që 100 ditët e para të PD-së do të jetë realitet”, tha ai.

Duke folur mbi elementët kryesorë të programit të PD-së për 4-vjeçarin e ardhshëm, Berisha tha se do të fillojmë me atë që e quajmë paketë e dhembshurisë.

“Kjo është një domosdoshmëri absolute. Ndaj dhe ne kemi vendosur që në 100 ditët e para do kalojmë ligjin për minimumin jetik. Minimumi jetik do të jetë për çdo shqiptar, për çdo pensionist që merr nën 200 euro, për çdo të papunë, për çdo person në ndihmë ekonomike, do jetë 200 euro. Nga ky minimum përfitojnë mbi 560 mijë pensionistë që janë me pensione të pjesshme”, tha ai.

Berisha shprehu bindjen se “Shqipëria nuk do ketë asnjë tarifë për mallrat amerikane se edhe SHBA do i heqë”.

“SHBA ka vendosur një sistem tarifash sepse të gjithë kanë pasur tarifa ndaj tyre. Kjo është e vërteta. Ta mësoni të vërtetën. Të gjithë këta që qahen sot, kanë pasur tarifa. Shqipëria nuk do ketë asnjë tarifë për mallrat amerikane dhe jam i bindur se kjo gjë do ndodhë edhe me qeverinë e SHBA-së pasi t’i heqim ne”, tha ai.

Ai siguroi se “motoja jonë është Made in Albania”. Ne do bëjmë gjithçka që shqiptarët të prodhojnë dhe të krijojnë mirëqenie kudo që janë.”Ne do ulim taksat për bizneset në 10 përqind. 10 përqind është taksa e drejtë, është taksa e librave të shenjtë, taksa e shekujve dhe mijëvjeçarëve. E provuam, dha rezultate të shkëlqyera. Jo vetëm që nuk u pakësuan të ardhurat, u dyfishuan të ardhurat. Ne do bëjmë gjithçka që Made in Albania të mbushë tregjet shqiptare dhe tregjet e botës”, tha ai.

Berisha komentoi edhe ndalimin e kreut të Ballit Kombëtar Adriatik Alimadhi.

“Ky regjim që në vitin elektoral vendos të arrestojë liderët e tre partive kryesore opozitare dhe më së fundmi mbrëmë, në mënyrën më brutale, më staliniste, arreston kryetarin e një partie tradicionale, të Ballit Kombëtar, në lokalin e tij, vetëm pse u kërkoi, i pyeti: çfarë doni, pse keni ardhur, një bande me reformë”, tha ai.

Fraksion.com