“Ti i di tamam punët e Amerikës”, Rama ironizon Bashën në ‘Zgjimi i Lulit (episodi 10)’
Kryeministri Edi Rama, njëkohësisht kryetar i Partisë Socialiste ka vijuar sot replikat me drejtuesin politik të koalicionit Euroatlantik, Lulzim Basha.
Në një video të publikuar në rrjetet sociale, të titulluar “Zgjimi i Lulit (episodi 10)”, Rama ironizoi Bashën duke theksuar se vetëm ai i di tamam punët e Amerikës.
Rama iu përgjigj pretendimit të Bashës, sipas së cilit kryeministri nuk ka dhë asnjë koment mbi kthimin e ekspertëve të SHBA-së në SPAK.
“Nuk e ke pasur mendjen. Ta kam kthyer përgjigjen, madje të kam thënë nuk dal unë kurrë para teje, kur vjen puna te Amerika. Ti i di tamam punët e Amerikës. Amerika ty të ka këtu. Si do them unë unë? Thua ti është kthyer fuqishëm, me siguri kështu do jetë. Është kthyer fuqishëm, pikë mbaroi, e ka thënë Luli”, ironizoi Rama.
Kryeministri iu referua edhe formatit të komunikimit që ka zgjedhur Basha në fushatë.
“O Lul, po ti ke ftuar ata të rinjtë aty dhe flet me të rinjtë në ekran. Po aman mor burrë kthehu te ata që ke aty. Nuk ka lezet fton ata dhe flet me këta në ekran”, shtoi ai.
Basha publikoi edhe komentin e një qytetari sipas së cilit ka bërë marrëveshje me Ramën.
“Ik ore thuaji atij nuk kam nevojë unë të bëj marrëveshje me Ramën, Ramën e mund edhe në gjumë unë, e mbys”, ironizoi Rama.
Rama replikoi në distancë me Bashën, i cili u bëri thirrje shqiptarëve që “në 11 maj mos t’i thonë trurit mirupafshim por ta vendosin në punë dhe të votojnë koalicionin euroatlantik”.
“Po mos e teprove pak që i thua shumicës së shqiptarëve ju ka ikur truri pse votojnë për mua apo e meritojnë thuaj?! Unë mendoj se e teprove pak si shumë, po punë e madhe, ti gjumin në xhep e ke”, ironizoi Rama.
Fraksion.com
