Tenderi 10 mijë eurosh për t’i larë Audin A8 Ballukut, Berisha: Kishte përcaktuar edhe solucionet dhe furçat

Kreu i Partisë Demokratike, Sali Berisha ka komentuar tenderin e bërë nga zv.kryeministrja dhe ministrja e Infrastrukurës dhe Energjisë, Belinda Balluku për larjen e makinës së saj tip Audi A8.

Berisha teksa i referohet dokumenteve të publikuar më herët nga Ballkanweb thotë se “Balluku përcaktonte si duhet të ishin furçat dhe solucionet për t’i larë makinën”. Berisha tha se këta janë kandidatët e Partisë Socialiste, me dosje dhe akuza të rënda krimi.

“A t’i marrim kandidaturat e PS-së? Çfarë kemi aty, kemi një seri zyrtarësh dhe ministrash me barrë të rëndë krimi dhe akuza ndër më të rëndat. Belinda Balluku ka bërë tender për të larë njëherë çdo javë makinat e saj me 10 mijë euro. 10 mijë euro lavazhi, ai i kishte vënë tituj të bukur “sauna e makinave të Ballukut”. Thoshte që ky lavazh duhet të jetë jo më larg se dy km nga ministria, duhet të ketë këto furçe, duhet të ketë këto lloj solucionesh. Kur e lexova mendova mos ishte ndonjë humor i gazetarit. Por gazetari kishte publikuar të gjitha dokumentet e tenderit. Në muaj 10 mijë euro lavazh. Këta janë kandiddatët e PS. Të tjerët janë fasadë për të bërë makijazhin e Edi Ramës”, tha Berisha në emisionin Opinion.

TENDERI 

Zv.kryeministrja Belinda Balluku, njëherësh ministre e Energjetikes dhe Infrastrukturës ka urdhëruar hapjen e një procedure tenderi për larjen e makinës së saj dhe të aparatit të institucionit që drejton.

Në këtë procedurë të çuditshme, ministrja e cila është akuzuar nga  opozita dhe nga Sali Berisha si “Lubia e tenderave”, Belinda Ballaku kërkon që makina me të cilën lëviz, t’i lahet me fshesë me kompresor po ashtu kërkon: “Larje e automjeteve me solucion dhe jo furçe”.

“1 . Lavazho duhet të ketë ambient parkimi minimalisht për 4 automjete brenda territorit ose në dispozicionin e vet me qëllim që mjeti mos të presë në rrugë.
2. Lavazho të ndodhet brenda qytetit të Tiranës, mundësisht në një distancë jo më shumë se 2 km nga MIE dhe të jetë në shërbim edhe në oraret e pasdites (me dy turne), të punojë dhe ditën e shtunë.
3. Lavazho të ketë minimalisht 3 poste larje dhe minimalisht katër punonjës ( vetëdeklarim)

Karakteristika te veçanta: Larje e plotë e automjeteve (brenda dhe jashtë) për 30 minuta; Pastrimi nga brenda të bëhet me fshesë me kompresor;  Larje e automjeteve me solucion dhe jo furçë; Orari i kryerjes së shërbimit nga ora 07:00 deri në orën 09:00,cdo ditë të javës; Automjeti do të presë në radhë për kryerjen e shërbimit jo më shumë se 30 minuta nga paraqitja në vendin e kryerjes së shërbimit”, thuhet në dokumentet e tenderit.

Procedura është bërë në datën 28 mars 2025.  E para që do të lahet është mjeti AUDI A8, që lëviz Belinda Balluku.

“Lloji i automjetit Audi A8, njësia për ta larë në muaj është 12 herë dhe periudha e shërbimit mujore” thuhet në dokument. Ose më saktë; vetura e ministres Balluku të lahet një herë në dy ditë pune.

Lista e makinave vijon me larjen e një mjeti “Toyota” 8 herë në muaj, e një “Volksëagen Touareg” 4 herë muaj. Apo e një mjeti “”Hyundai” 8 herë në muaj.

Një tjetër mjet tip “Volksëagen Tiguan” kërkohet të lahet 10 herë në muaj, një “Land Rover” 2 herë në muaj apo një “Toyota Rav 4” 10 herë në muaj.

Gjithashtu është edhe një mjet “Citroen” që të lahet 2 herë në muaj, një “Skoda” dy herë në muaj apo edhe një fuoristradë “Toyota” 10 herë në muaj.

Në dokumente është edhe një zë shërbimi, teksa kërkohet larje tapicerie 10 herë në vit, për 3 vetura dhe 7 fuoristrada.

Fraksion.com