Spahia pas seancës në GJKKO: Nuk pranova gjykim të shkurtuar, padia po përdoret politikisht

Ish-kryetari i bashkisë së Shkodrës, Bardh Spahia e cilësoi sot si politike padinë e ngritur nga ish-drejtori i Ujësjellësit të Shkodrës, Mark Molla, çështje për të cilën ai po gjykohet në GJKKO.

Në një prononcim për mediet pas zhvillimit të seancës në Gjykatën e Posaçme Kundër Korrupsionit dhe Krimit të Organizuar (GJKKO), Spahia tha se nuk ka pranuar gjykim të shkurtuar.

“Ishte formalitet i gjykatës për ta dërguar çështjen time për gjykim. Nuk pranova gjykimin e shkurtuar, kërkova gjykimin normal duke qenë i bindur se është padi e përgatitur në zyrat e Partisë Socialiste, të cilët përdorin një person të dënuar për vjedhje dhe korrupsion, për të ngritur padi ndaj meje, për ta përdorur politikisht në kohë elektorale. Akuza nuk qëndron. Në gjithë veprimtarinë time kam pasur udhërrëfyes zbatimin e ligjit dhe mbrojtjen e interesave të qytetarëve të mi”, tha Spahia.

“Kontrolli i Lartë i Shtetit ka bërë një relacion ku kërkonte shkarkimin për abuzime. Përdoret ky person për të ngritur padi ndaj meje thjesht e vetëm për ta përdorur politikisht në një kohë fushate elektorale. Nuk qëndron akuza aspak. Në të gjithë veprimtarinë time si kryetar i bashkisë Shkodër kam pasur udhërrëfyes vetëm zbatimin e ligjit dhe mbrojtjen e interesave të bashkëqytetarëve të Shkodrës”, nënvizoi Spahia.

I pyetur se nga gazetarët për pretendimin e SPAK se si kryebashkiak ka injoruar një vendim gjyqësor, Spahia e mohoi të jetë e vërtetë.

“Sot patëm rastin ta shpjegojmë përmes avokatëve. Kam zbatuar vetëm ligjin, por siç e thashë akuza dhe padia është ngritur mbi bazë dhe porosi politike, të cilat ju siguroj që do të marrin përgjigjen e duhur më 11 maj. Nuk do të na pengojnë dhe ndalojnë aspak  në rrugën tonë drejt fitores së 11 majit”, u shpreh ai.

Spahia theksoi se “kam bindjen e plotë që do të fitojmë jo vetëm këtë betejë por edhe betejën më të rëndësishme për shqiptarët siç është ajo e 11 majit”.

Në shkurt të këtij viti SPAK dërgoi për gjykim dosjen e Spahisë, i marrë i pandehur për pengim të ekzekutimit të vendimeve gjyqësore. Spahia u kallëzua nga ish-drejtori i Ujësjellësit të Shkodrës, Mark Molla.

Fraksion.com