“Luli ishte kukulla në krye”, Rama: Opozita, penguesja e madhe e reformës në drejtësi! Kërcënuan me çadra e bojkot

Kryeministri Edi Rama vlerësoi sot se lëvizja e paimagjinueshme deri dje e drejtësisë në hetimin dhe ndëshkimin e personave të lidhur me pushtetin politik erdhi pikërisht sepse Partia Socialiste dorëzoi shpatën e drejtësisë te duart e institucioneve të reja.

Në një komunikim live në rrjetet sociale përmes rubrikës “Sy m’sy”, Rama u shpreh krenar që socialistët dhe progresistët janë ata që bënë të mundur të pamendueshmen, dorëzimin e shpatës së drejtësisë në duart e drejtësisë nga duart e pushtetit politik.

“Kjo ndodhi nga kjo zyrë ku ka qëndruar shpata e drejtësisë nga viti 1912, jo fizikisht këtu por në duart e të parit të shtetit, qoftë mbret, diktator apo president siç ishte lumëmadhi që sot është kthyer në buf dhe që burgosi kundërshtarin e tij”, tha Rama.

Sipas tij, mund të ketë plot të meta, boshllëqe apo edhe lajthitje të institucioneve të reja të drejtësisë, por ky është një moment historik.

Ndërkohë, Rama theksoi se që të garantohet barazia para ligjit nuk mund të jetë thjesht dhe vetëm në dorë të një partie politike dhe vullnetit të një lidershipi të një partie.

“Nesër mund të vijë një tjetër dhe e kthen përmbys. Prandaj duhet BE. Hyrja në BE e bën të pamundur që një apo disa forca këtu të kthejnë përmbys rrotën e historisë dhe të rikthejnë shpatën e ndëshkimit të drejtësisë në zyrën e qeverisë. Këtë po bën PS”, tha Rama.

Kryeministri theksoi se “pikërisht për këtë të gjithë ata njerëz të degraduar dhe dëshpëruar rrinë e përsërisin burgu, burgu”.

“Ata duhet ta marrin përgjigjen në 11 maj sepse ata nuk kanë asnjë rol në këtë histori. Janë penguesit dhe armiqtë e reformës në drejtësi e morën peng për një periudhë kohe me çadër këtu në bulevard për të mos votuar vetingun dhe kërcënuar me bojkot të zgjedhjeve. Të gjithë bashkë, Luli ishte në krye por ishte kukulla e bufit të kënetës dhe bufi i kënetës sot e e thotë shumë qartë se me votën e 11 majit do të shkrijë SPAK. Ky është kërcënimi që ndodh sot dhe mund të jetë në të ardhmen në lëvizjet e brendshme nëse ne nuk jemi në BE”, shtoi ai.

Fraksion.com