AktualitetPolitikëTë fundit

Apeli i GJKKO merr vendimin, Erion Veliaj lihet në burg. Ndryshon masa për biznesmenin Elman Abule

Apeli i GJKKO ka marrë vendimin në lidhje me ankimimin e kryebashkiakut të Tiranës Erion Veliaj në lidhje me masën e sigurisë “Arrest me burg”.

Lajmi konfirmohet për BalkanWeb nga gazetarja Klodiana Lala.

Gjykatësi Engert Pëllumbi ka marrë parasysh kërkesën e prokurorëve të posaçëm Ols Dado dhe Altin Dumani që këmbëngulën në mbajtjen e Veliaj në qeli, pasi sipas tyre vë në rrezik procesin, duke pasur mundësi të prishë provat apo intimidojë dëshmitarët.

Ndërkohë gjykata ka ndryshuar masën për biznesmenin Elman Abule nga “arrest me burg” në “arrest shtëpie”.

 

Vendimi i Apelit të GJKKO

 

  1. Miratimin e vendimit Nr. 7 Akti, datë 09.02.2025, të Gjykatës së Posaçme të Shkallës së Parë për Korrupsionin dhe Krimin e Organizuar, i verifikuar me vendimin Nr. 14, datë 12.02.2025, të kësaj gjykate, me këtë ndryshim:
  • Zëvendësimin e masës së sigurimit personal me karakter shtrëngues “Arresti në burg”, e parashikuar nga neni 238 i Kodit të Procedurës Penale, e vendosur për personin në hetim E.A., me masën e sigurimit “Arresti në shtëpi”, e parashikuar nga neni 237 i këtij Kodi;
  • Urdhërohet personi nën hetim E.A. që të mos largohet nga banesa e tij, e cila ndodhet në “***”, si dhe që të mos kontaktojë me persona të tjerë, përveç atyre me të cilët bashkëjeton;
  • Urdhërohet lirimi i menjëhershëm i personit nën hetim E.A. nga ambientet e paraburgimit, nëse nuk mbahet i izoluar për ndonjë shkak tjetër.
  1. Ngarkohet Prokuroria e Posaçme kundër Korrupsionit dhe Krimit të Organizuar dhe shërbimet e policisë gjyqësore për zbatimin e këtij vendimi.
  2. Kundër këtij vendimi mund të bëhet rekurs në Gjykatën e Lartë, brenda 45 (dyzet e pesë) ditëve nga e nesërmja e njoftimit të tij.

***

Kryebashkiaku i Tiranës Erion Veliaj akuzohet nga SPAK për korrupsion dhe pastrim parash në 9 raste. Veliaj u arrestua mesditën e 10 shkurtit, ndërsa dy ditë më pas GJKKO me vendim të gjyqtarit Erjon Bani vlerësoi të ligjshëm arrestimin e tij duke e lënë në qeli.

 

Fraksion.com