Zelensky shpreson për “hapa të fortë” nga SHBA nëse Rusia nuk pranon propozimin e armëpushimit

Presidenti ukrainas Volodymyr Zelensky tha se beson se Kievi “mund të presë” që Shtetet e Bashkuara të ndërmarrin “hapa të fortë” kundër Rusisë nëse Moska do të refuzonte propozimin e armëpushimit të rënë dakord nga Ukraina dhe SHBA të martën.

“Me sa kuptoj unë mund të presim hapa të fortë. Nuk di detaje, por ne po flasim për veprimet përkatëse të sanksioneve dhe forcimin e Ukrainës”, tha Zelensky.

Duke folur para gazetarëve të mërkurën, Zelensky tha se Ukraina pranoi një armëpushim 30-ditor të propozuar nga SHBA-ja që do të përfshinte një armëpushim në det, në ajër dhe në tokë.

Ai tha se kjo periudhë do të përdoret për të përcaktuar kushtet e një marrëveshjeje të ardhshme paqeje – duke përfshirë çfarë lloj garancish sigurie mund të ofrohen nga aleatët perëndimorë të Ukrainës.

“Gjithçka varet nga Rusia. SHBA ndërmori hapa, Ukraina e bëri të qartë pozicionin (e saj). Tani Rusia duhet të përgjigjet”, u tha udhëheqësi ukrainas gazetarëve në konferencën për shtyp në Kiev.

Zelensky u pyet vazhdimisht se çfarë do të ndodhte nëse Rusia thyente armëpushimin 30-ditor, por ai nuk dha një përgjigje konkrete – duke sugjeruar se detajet e ndonjë armëpushimi ende nuk janë rënë dakord.

Rusia deri më tani ka refuzuar të komentojë mbi planin, me zëdhënësin e Kremlinit, Dmitry Peskov, duke thënë më herët të mërkurën se Moska po priste të informohej mbi propozimin nga zyrtarët amerikanë.

Fraksion.com