Tabaku: Procesi i integrimit është për shqiptarët, jo për politikën
Kryetarja e Komisionit për Europën dhe Punët e Jashtme, Jorida Tabaku deklaroi sot se integrimi në Bashkimin Europian është qëllim i përbashkët i të gjitha forcave politike, ndërsa shprehu gatishmërinë dhe angazhimin e opozitës që ky proces të vijojë.
Në mbledhjen e konferencës së komisioneve parlamentare për Integrimin Evropian dhe Çështjet Evropiane të shteteve pjesëmarrëse në procesin e Stabilizimit dhe Asociimit të Evropës Juglindore, Tabaku u ndal te roli i komisionit që drejton në procesin e integrimit europian.
Në këtë takim i cili mblidhet nën presidencën shqiptare, marrin pjesë delegacione parlamentare nga Mali i Zi, Bosnje-Hercegovina, Kosova, Maqedonia e Veriut Turqia, ndërsa të ftuar janë edhe delegacione nga Ukraina, Moldavia, dhe Gjeorgjia.
Në fjalën e saj, Tabaku u ndal te rritja e bashkëpunimit në rajon, por njëkohësisht edhe rritja e dimensionit parlamentar.
“Zgjerimi i bashkimit europian dhe prioriteti i zgjerimit euroatlantik për rajonin mbetet i pandryshuar dhe prioritet kryesor i të gjitha vendeve tona është procesi i integrimit. Këtu rol të veçantë luan edhe ravijëzimi i politikës së jashtme me politikën e jashtme të BE-së”, vlerësoi Tabaku.
Tabaku theksoi domosdoshmërinë e intensifikimit të përpjekjeve që prioritetet strategjike por edhe politika e jashtme të jenë të orientuar pikërisht aty ku ka më shumë nevojë, zgjerimin e rajonit tonë.
“Integrimi në BE është një qëllim i përbashkët i të gjitha forcave politike ndaj shpreh edhe njëherë gatishmërinë dhe angazhimin e opozitës shqiptare që ky proces megjithëse në mungesë të rezultateve konkrete në shumë prej fushave, të vazhdojë”, tha ai.
Tabaku theksoi angazhimin që komisioni që drejton ka pasur për sa i përket rritjes së rolit të Kuvendit për bërjen e procesit të integrimit, një proces gjithëpërfshirës kombëtar që është për shqiptarët dhe jo për politikën.
“Procesi i integrimit në çdo kapitull negociatash vendos angazhime dhe objektiva të cilat duhet patjetër të jenë të fokusuara drejt qytetarëve, përndryshe ne do ta humbim momentumin për të pasur pikërisht atë mbështetje popullore që ky proces ka nevojë”, tha ajo.
Fraksion.com
