“Një copë tokë pa taksa polici dhe pa ushtri “, Baba Mondi për AFP: Shteti ynë do të jetë një shtet vërtet i vogël por me zemër të madhe

Në kryeqytetin e Shqipërisë, Baba Mondi parashikon një shtet të ngjashëm me Vatikanin për besimin e tij bektashi në një copë toke të vogël që do të shërbente si një model për dashurinë dhe tolerancën, sipas AFP.

Vitin e kaluar, kryeministri Edi Rama njoftoi planet për të krijuar një mikroshtet sovran mysliman brenda kufijve të vendit të drejtuar nga sekti sufi me rreth 100,000 anëtarë.

“Shteti ynë do të jetë një shtet vërtet i vogël shpirtëror dhe administrativ… por me zemër të madhe”, tha lideri bektashian për AFP në Tiranë, i veshur me një tunikë të bardhë dhe me një xhaketë dhe kapele jeshile.

“E gjithë bota do të mund të shohë dritën e bektashinjve”, tha ai.

Krijimi i një shteti fetar në Shqipëri do të kishte qenë i paimagjinueshëm gjatë diktaturës komuniste katër dekadash të Enver Hoxhës, i cili ndaloi plotësisht fenë dhe persekutoi klerikët dhe priftërinjtë.

Qindra klerikë nga të gjitha besimet u ekzekutuan, u burgosën ose u dërguan në mërgim, ndërsa vendet e adhurimit u shkatërruan.

Por, që nga rënia e komunizmit në fillim të viteve 1990, ka pasur një vërshim të shprehjes fetare në shumë cepa të Shqipërisë.

Bektashinjtë renditen si komuniteti i katërt më i madh fetar në Shqipëri, pas myslimanëve sunitë, të krishterëve ortodoksë dhe katolikëve.

Dhe ndërsa detajet burokratike të shtetit janë ende duke u përpunuar së bashku me një datë zyrtare për nisjen e tij, Baba Mondi ka plane ambicioze për kombin e tij të ardhshëm.

“Ky shtet nuk do të ketë as polici, as ushtri, as taksa, do të jetë shpirtëror”, tha kreu.

“Qëllimi i tij do të jetë organizimi dhe mbrojtja e bektashinjve në mbarë botën”, shtoi ai.

Shteti bektashi do të avokojë gjithashtu për anëtarët e persekutuar që jetojnë në vende ku ata nuk kanë të drejtë të praktikojnë fenë e tyre “si në Turqi apo Iran”, sipas liderit të tij.

Shteti i ardhshëm do të vendoset në tokën ku tashmë ndodhet, një tempull bektashian në Tiranë dhe do të zërë vetëm 0,11 kilometër katror (0,04 milje katrorë) – duke e bërë atë vendin më të vogël në tokë.

Vatikani aktualisht mban titullin me vetëm 0,44 kilometra katrorë territor.

Paqe dhe dashuri

Rendi Bektashi u themelua në shekullin XIII në Perandorinë Osmane dhe konsiderohet si një degë tolerante, mistike e Islamit e hapur ndaj feve dhe filozofive të tjera.

Disa udhëheqës kryesorë u zhvendosën në Shqipëri pasi u ndaluan në Turqi nga babai themelues i shtetit modern Mustafa Kemal Ataturk në fillim të shekullit XX.

Ndryshe nga besimet më konservatore të Islamit, besimtarët bektashi – burra dhe gra – adhurojnë së bashku dhe konsumimi i alkoolit lejohet, por nuk nxitet.

“Rakia, ashtu si qumështi i nënës, ka përfitime, sepse shkon drejt e në tru pa kaluar nga stomaku”, tha Baba Mondi, duke iu referuar rakisë popullore që është e përhapur gjerësisht në të gjithë Ballkanin.

“Praktika është pjesë e një vizioni të përgjithshëm të tolerancës dhe promovimit të harmonisë që është thelbësore për mendimin bektashian”, sipas Baba Mondit.

“Kudo që janë, bektashinjtë kanë shprehur gjithmonë dashuri, bujari dhe respekt për njerëzit si krijesat më të përsosura në këtë botë”, shtoi ai.

“Ne jemi kundër konflikteve të shkaktuara nga ekstremistët, ne jemi për paqen dhe dashurinë”, tha ai.

Për kryeministrin e Shqipërisë, sigurimi i bektashinjve me qeverinë e tyre ka të bëjë pjesërisht me mbrojtjen e frymës së tolerancës.

“Ne duhet të kujdesemi për këtë thesar që është toleranca fetare, që ta ruajmë dhe promovojmë atë”, tha Rama në një fjalimi në janar, me rastin e 95-vjetorit të transferimit të selisë së shenjtë bektashiane nga Turqia në Shqipëri.

Ai ende nuk ka zbuluar një afat kohor për krijimin e shtetit.

Por, për Baba Mondin dhe ndjekësit e tij sufi, e ardhmja është e mbushur me mundësi.

“Bektashizmi ka qenë dhe do të mbetet një urë lidhëse midis Lindjes dhe Perëndimit”, tha ai.

“Ne kemi qenë gjithmonë një rrugë e mesme në këtë botë për të treguar se mund të jetojmë me dashuri, paqe dhe mirësi”, shtoi Baba Mondi.

 

Fraksion.com