“I kërkohet të pranojë atë që s’ka bërë”, Rama: Kam informuar ministrin e Drejtësisë për një tjetër rast intimidimi nga prokurorët

Kryeministri, njëherësh Kryetari i Partisë Socialiste, Edi Rama deklaroi sot në dëgjesën e Grupit Parlamentar me rektorin e Universitetit Bujqësor të Tiranës, Fatbardh Sallaku se, ka informuar ministrin e Drejtësisë për një tjetër rast intimidimi nga prokurorët.

“Klotilda foli herën e kaluar ne nuk bëmë asnjë koment. Ne nuk i thamë Klotildës ke gjithë mbështetjen tonë se ti je e pafajshme. Ne nuk i them prokurorëve, apo gjykatësve që shikoni se Klotildën e kemi tonën dhe ju mos e ngacmoni. Absolutisht. Por ama sigurisht që ne nuk mund të rrimë dhe të bëjmë sikur s’kuptojmë kur kryetarja e Komisionit ë Ligjeve e merr vesh nga televizori që është person i dyshuar, se ky është kulmi. Nuk mundet ta pranojmë ne këtë”, tha Rama.

“Nuk mund ta pranojmë ne këtë që SPAK-u është redaksi lajmesh, me një grup gazetarësh që tundin dosjet e tundin akuzat përpara sesa vetë ata që janë aty brenda të marrin lajmin që janë të akuzuar”, theksoi Rama.

“Nuk mund ta pranojmë ne që njerëzit të merren dhe intimidohen atje si persona në dijeni pa ju dhënë as status, vetëm e vetëm që mos marrin avokatin”, u shpreh Rama.

Kryeministri u shpreh se ka informuar Ministrinë e Drejtësisë për një tjetër rast intimidimi.

“Se nuk dua të flas. Kam informuar ministrin e Drejtësisë për një intimidim tjetër, shumë të rëndë, të një nëne me dy fëmijë, të cilës i kërkohet që të pranojë atë që s’ka bërë. Dhe i thuhet o do pranosh këtë, ose do ta hash më keq sesa ata të cilët do t’i zhysësh brenda. Tani më fal ku jemi këtu”, tha Rama

Fraksion.com