AktualitetPolitikëTë fundit

Ndryshimet në Kodin Zgjedhor, Bardhi: Mbështesim propozimet e Komisionerit Zgjedhor

Kryetari i Grupit Parlamentar të Partisë Demokratike, Gazment Bardhi, tha se “lidhur me ndryshimet në Kodin Zgjedhor, PD mbështet ndryshime që nuk janë as të PD dhe as të PS, por të Komisionerit Shtetëror të Zgjedhjeve, që lidhen me dy aspekte teknike të procesit për të garantuar votën e bashkëqytetarëve tanë që jetojnë jashtë vendit”.

Duke marrë fjalën në seancën e Kuvendit, Bardhi shpjegoi se, “bëhet fjalë për shkurtimin e afatit të përgatitjes së fletës së votimit që lidhet me regjistrimin nga partitë politike, deri te kandidatët, për të patur më shumë kohë Komisioni Shtetëror i Zgjedhjeve, për ta dërguar në adresat e bashkatdhetarëve tanë në të gjithë botën, fletën e votimit brenda afatit në ditën e zgjedhjeve në orën 19:00”.

Ndryshimi i dytë, vijoi ai, ka të bëjë me faktin që shteti do të marrë përsipër çdo shpenzim për votimin e emigrantëve.

Ai tha se ishte i papranueshëm propozimi i socialistëve që emigranti për të marrë fletën nuk paguan asgjë, ndërsa për ta dorëzuar fletën e votimit do të duhet të paguajë taksën e postës. “Nuk mund t’i kushtëzohet vota me pasjen apo mospasjen e mundësisë financiare për të paguar postën”, tha Bardhi.

Bardhi theksoi se cilido që ka një dokument biometrik identifikimi ka të drejtë të votojë dhe Kodi Zgjedhor nuk specifikon se dokumenti biometrik do të duhet të jetë shqiptar apo i SHBA-së.

Bardhi deklaroi se vota e shqiptarëve që kanë dokumente të vendit ku jetojnë nuk rrezikojnë zgjedhjet në Shqipëri.

“Zgjedhjet i dëmton përdorimi i administratës shtetërore në zgjedhje. Ti që drejtues politik i qarkut Dibër i ke dhënë urdhër çdo punonjësi të sjellë listë me 10 emra të votuesve jashtë vendit, sepse nëse nuk i sjell 10 emrat i rrezikohet vendi i punës dhe kjo e rrezikon integritetin e zgjedhjeve dhe jo vota e emigrantëve që nuk kanë dokument biometrik shqiptar, por kanë vendit ku jetojnë”, tha ai.

Sekretari i Përgjithshëm i Partisë Socialiste ka deklaruar se propozimet e opozitës në lidhje me votimin me dokumente të huaja nga ana e diasporës në 11 maj, është një përpjekje për të krijuar një mekanizëm lehtësisht të manipulueshëm.

Në fjalën e tij në Kuvend, Klosi shtoi se kjo është një hile e vjetër dhe jo një dëshirë që shqiptarët që jetojnë jashtë vendit të votojnë sa më shumë.

“Ti nuk i di hilet, koleg, pasi nuk je pjesë e kupolës që vendos listat. Ti di çfarë thuhet, dhe jo çfarë mendohet. Edhe nuk e di se çfarë mendohet pasi s’ke aftësinë ta kuptosh edhe atë që thashë unë. Është shumë e thjeshtë, unë s’thashë ‘dokument’, thashë ajo që prodhon me celular. Kërko në Google, çdo kartë ID të vendeve që ti pretendon se nga do të vijnë të votojnë, kjo foto që ta jep interneti, që mund të manipulohet, futet emri dhe fytyra e kujtdo, në dy minuta më jep emrin dhe vendin. Kjo foto e ardhur nga Belgjika nuk verifikohet dot në rast se si një shqiptar që ka ID në Belgjikë dhe e fut kur bën regjistrimin, fut të dhënat e tij biometrike të cilat krahasohen me të dhënat që ka regjistri, ndërsa kjo foto nuk prodhon asnjë të dhënë biometrike. Kjo fotot nuk është karta, s’ka të dhënat biometrike që të krahasohen me databazën e gjendjes civile. Kjo, për kulturën tuaj, pasi nuk je pjesë e politikës së madhe të katit të tetë, por je e zhurmës këtu”, tha Klosi.

“Sa i takon PS, ne fitojmë sepse kemi shumë njerëz që punojnë. Ne fitojmë pasi jemi të rioganizuar në çdo cep të Shqipërisë. Jemi të organizuar dhe në Greqi, Gjermani, Londër, SHBA apo Kanada. Ne punojmë për votën, ju punoni për sherrin tuaj. Kemi dy vjet që punojmë për të gjetur njerëzit tanë dhe mbështetësit tanë kudo. Ne jemi të gatshëm të kemi 181 000 regjistrime të kemi mazhorancë shumë të madhe në votë. E vetmja gjë që keni bërë është të ziheni me njëri-tjetrin dhe e vetmja krenari që keni është se nga një parti, keni bërë katër parti”, tha ai.

 

Fraksion.com