Arrestimi i Veliajt,Tabaku: Sistemi që keni ndërtuar prej vitesh po ekspozohet para syve të shqiptarëve

Në seancën e sotme plenare kanë nisur diskutimet për ndryshimet në Kodin Zgjedhor për votimin e shtetasve shqiptarë nga jashtë.

Deputetja e Partisë Demokratike, Jorida Tabaku në fjalën e saj tha se “vota e diasporës është një premtim që nuk po shkon ashtu siç duhet, duke qenë se deri në momentin e fundit po diskutojmë se çfarë duhet bërë dhe çfarë nuk duhet bërë”.

Tabaku tha më tej se “arsyeja pse shqiptarët po largohen lidhet me sistemin që është ngritur këtu”.

Deputetja e PD-së u ndal edhe tek arrestimin i kryetarit të bashkisë Tiranë, Erion Veliaj nga SPAK.

“Nuk është vetëm një arrestim, por provë e qartë se sistemi që keni ndërtuar prej vitesh po ekspozohet para syve të shqiptarëve. Është pasqyrim i një mekanizmi të tërë të kapjes së shtetit. Sot, mbas gjithë këtyre viteve abuzim, shqiptarët po e shohin të vërtetën e një sistemi të kalbur që ka shfrytëzuar pushtetin për pasurimin e një grushti njerëzish. Deri tani kemi parë majën e ajsbergut. Skemë e organizuar që ka rrjepur buxhetin e shtetit për vite me radhë”, tha Tabaku.

Tabaku nënvizoi se “kjo është pjesë e një skeme që ka kapur ekonominë dhe drejtësinë në vend”.

“Kjo është ajo që bëri Ahmetaj, Beqja, kjo është mënyra si funksion sistemi socialist. Ky është vetëm fillimi i shembjes së një kulture kriminale që për 12 vite ka vjedhur, ka abuzuar, ka ndërtuar oligarki ekonomike të pangopur. Arrestimi i Veliajt nuk shënon fundin e korrupsionit, por ekspozon se si korrupsioni është futur në çdo segment të administratës shqiptare”, u shpreh Tabaku.

Sipas Tabakut, “ky nuk është thjeshtë një sistem korruptiv, por mekanizëm i ndërtuar për të ndëshkuar qytetarët e për të shpërblyer një pakicë”.

Tabaku tha më tej se “çdo gjë që opozita ka denoncuar është e vërtetë”.

“Pas Veliajt, vjen rrëzimi i të gjithë piramidës së korrupsionit që ka mbajtur peng Shqipërinë. Kjo familje socialiste për pushtet ka shkatërruar çdo gjë që ka mbetur në Shqipëri. Njerëz pa asnjë cilësi të veçantë kanë përfituar miliona euro, ndërkohë që ishin njerëz të afërt të partisë”, tha Tabaku.

Tabaku shtoi se “nuk besoj se sot ka vend për të heshtur, sot ka vend për të folur, për të vazhduar për të luftuar që këto modele duhet të ndalojnë. Nuk ka asnjë zgjidhje tjetër Shqipëria, në këtë betejë mes të mirës dhe të keqes duhet zgjedhur e mira dhe jo largimi”.

Fraksion.com