PD: Veliaj të shkarkohet, Tirana të shkojë në zgjedhje

Partia Demokratike ka kërkuar që Kryeministri Edi Rama të shkarkojë nga detyra Erion Veliajn i arrestuar me urdhër të SPAK për akuza korrupsioni dhe pastrimi parash, dhe bashkia e Tiranës të shkojë në zgjedhje.

Në një deklaratë për mediet, kryetari i këshilltarëve bashkiakë në Partinë Demokratikë në bashkinë e Tiranës, Ilir Alimehmeti kërkoi që të përdoret i njëjti standard që është përdorur në rastin e ish-kryebashkiakëve të tjerë të cilët kanë pasur probleme me drejtësinë.

“Ne kërkojmë të përdoret i njëjti standard që është përdorur në rastin e Elvis Roshit në Kavajë,  Shukri Xhelilit në Dibër, Safet Gjicit në Kukës, Jorgo Goros në Himarë, etj. Për shkelje në magnitudë shumë më të ulët se Veliaj, këta ish-kryetarë bashkish janë shkarkuar ose u është kërkuar dorëheqja, për t’iu hapur rrugë zgjedhjeve vendore, siç përcaktohet me ligj”, nënvizoi më tej Alimehmeti.

Sipas Alimehmetit, emërimi i kryetares së deleguar të bashkisë Tiranë është “në kundërshtim të plotë të Kushtetutës dhe të çdo ligji në fuqi”.

“Shumë qartë është e përcaktuar se pushteti qendror dhe pushteti vendor janë të pavarur nga njëri-tjetri dhe përcaktimi i drejtuesve të tyre vjen vetëm përmes votës dhe organeve përfaqësuese të zgjedhur përmes saj. Kjo do të thotë, shumë qartë, se detyra në këtë rast i takon kryetares së Këshillit Bashkiak, Romina Kuko, e cila hesht, si edhe 60 anëtarëve të tjerë të Këshillit Bashkiak të zgjedhur përmes votës”, tha Alimehmeti.

Alimehmeti theksoi se “kërkojmë, konform Kushtetutës dhe ligjit, shkarkimin e ish-kryetarit të Bashkisë Tiranë, dhe zgjidhjen e problemit të krijuar nga dyshja Rama-Veliaj përmes votës së lirë të qytetarëve të vjedhur të Tiranës. Tirana ka nevojë për zgjidhje të fortë, të qëndrueshme dhe ndryshim. Këtë zgjidhje nuk e ofron Rilindja që solli vdekjen klinike të saj”.

Fraksion.com