Arrestohen babë e bir, u sekuestrohen një pistoletë dhe doza të dyshuara kokainë

Shërbimet e Komisariatit të Policisë Nr. 4 Tiranë kanë finalizuar operacionin policor të koduar “Midnight”, në kuadër të goditjes së paligjshme në fushën e armëmbajtjes pa leje dhe shpërndarjes së drogave të forta.

Policia e Shtetit, në një postim në rrjetet sociale, informon se gjatë këtij operacioni është sekuestruar një armë zjarri pistoletë, municion luftarak dhe një sasi lënde narkotike e dyshuar kokainë, e ndarë në doza, gati për shitje.

Në pranga është vënë një 37-vjeçar dhe babai i tij, pasi tentoi ta fshihte lëndën narkotike dhe armën e zjarrit.

Pas organizimit dhe finalizimit të operacionit policor të koduar “Midnight” u bë kapja dhe arrestimi në flagrancë i shtetasve: R. Z., 37 vjeç, për veprat penale “Armëmbajtja pa leje” dhe “Prodhimi dhe shitja e narkotikëve” dhe B. Z., 65 vjeç, (babai i shtetasit R. Z.), për veprën penale ”Veprime që pengojnë zbulimin e së vërtetës”, të dy banues në Tiranë.

Sipas PSH në rrugën “Niko Avramo”, shërbimet e Policisë kanë ndaluar për kontroll automjetin me drejtues shtetasin R. Z., në të cilin kanë gjetur dhe sekuestruar një sasi lëndë narkotike të dyshuar kokainë.

Në vijim të veprimeve gjatë kontrollit në banesën e këtij shtetasi, shërbimet e Policisë gjetën dhe sekuestruan 1 armë zjarri pistoletë, municion luftarak dhe një sasi të dyshuar lëndë narkotike kokainë, e ndarë në doza, gati për shitje, me peshë totale rreth 36 gramë.

Ndërsa babai i 37-vjeçarit, shtetasi B. Z., sapo ka parë shërbimet e Policisë, ka tentuar të hedh lëndën narkotike në lavaman dhe të hedhë nga ballkoni armën e zjarrit.

Materialet i kaluan Prokurorisë, për veprime të mëtejshme procedurale.

Fraksion.com