Bardhi: Deputetët të tregojnë nëse kanë përdorur Sky ECC dhe Encro Chat

Në mbledhjen e Këshillit për Rregulloren, Mandatet dhe Imunitetin u shqyrtua edhe projektvendimi i propozuar nga Partia Demokratike për një ndryshim në Rregulloren e Kuvendit, ku çdo deputet të deklarojë nëse ka përdorur aplikacionet e koduara “SKY ECC” dhe “ENCROCHAT”.

Kreu i grupit parlamentar në Partinë Demokratike Gazment Bardhi tha se deputetët duhet ta nisin nga vetja për të bërë transparencë.

“Nuk po them se deputetet e kanë përdorur për krime. Mund ta kenë përdorur për arsye private të jetës së tyre. Por secili prej nesh do duhet të deklarojë e ka përdorur apo jo platformën e SKY ECC. Kjo është e gjitha. Kush nuk ka asgjë për të fshehur nuk ka pse të frikësohet. Për sa kohë, ne ia kemi vënë detyrim funksionareve të tjerë të shtetit do duhet ta nisim nga vetja. Kjo është e ndershme. Sa kohë detyrojmë një funksionar policie që paguhet me 600 mijë lekë të vjetra ne do duhet të nisim ne nga vetja. Ky është standard moral”, tha Bardhi.

Bardhi ftoi kolegët socialistë se nëse kanë shtesa dhe sugjerime për rregullime t’i diskutojnë dhe të bien dakord.

Fraksion.com