Presidenti i Shteteve të Bashkuara Joe Biden konfirmoi të mërkurën arritjen e marrëveshjes së armëpushimit dhe për lirimin e pengjeve mes Izraelit dhe Hamasit. “Mund të deklaroj që marrëveshja e armëpushimit dhe pengjeve është arritur ndërmjet Izraelit dhe Hamasit,” deklaroi Presidenti Biden nga Shtëpia e Bardhë. Ai tha se marrëveshja ishte arritur pas 15 muaj vuajtjesh dhe do të shoqërohet me shtimin e ndihmave humanitare në Gazë. “Luftimet në Gazë do të ndërpriten dhe së shpejti pengjet do të kthehen në shtëpi tek familjet e tyre”, tha ai. “Sot, pas shumë muajsh diplomacie intensive nga Shtetet e Bashkuara me Egjiptin dhe Katarin, Izraeli dhe Hamasi arritën një marrëveshje armëpushimi dhe për lirimin e pengjeve. Kjo marrëveshje do t’i ndalë luftimet në Gazë, do të shtojë ndihmat shumë të nevojshme humanitare për civilët palestinezë dhe do t’i bashkojë pengjet me familjet e tyre pas më shumë se 15 muajsh”, tha Presidenti Biden nga Shtëpia e Bardhë. Kryeministri i Katarit Sheikh Mohammed bin Abdulrahman Al Thani gjithashtu njoftoi se marrëveshja e armëpushimit ndërmjet Izraelit dhe Hamasit do të hyjë në fuqi të dielën. Sipas tij, negociatorët po punojnë me Izraelin dhe Hamasin për hapat që duhet ndërmarrë drejt zbatimit të marrëveshjes. Palestinezët festuan nëpër rrugët e Gazës, ku po përballen me krizë humanitare për shkak të mungesës së ushqimeve, ilaçeve dhe karburanteve. “Jam e lumtur, po qaj, po janë lot gëzimi”, tha Ghada, një nënë palestineze e pesë fëmijëve. Familjarët e pengjeve izraelite dhe miqtë e tyre po ashtu e pritën me gëzim lajmin e armëpushimit. “Ne, familjet e 98 pengjeve, e mirëpresim me gëzim të jashtëzakonshëm dhe me lehtësim marrëveshjen për të na i kthyer të dashurit tanë në shtëpi”, thanë ata përmes një deklarate. Presidenti Joe Biden gjithashtu vlerësoi “punën e fortë të diplomacisë amerikane” për arritjen e marrëveshjes. “Kam paraqitur kornizën e saktë të këtij plani më 31 maj 2024, pas së cilës ai u mbështet unanimisht nga Këshilli i Sigurimit i OKB-së”, theksoi Presidenti Biden. “Diplomacia ime nuk pushoi kurrë në përpjekjet për ta realizuar këtë.” Komentet e Biden erdhën pakë kohë pasi presidenti i zgjedhur Donald Trump në një postim në mediat sociale pretendoi se fitorja e tij në zgjedhje ishte ajo që solli marrëveshjen. Presidenti i zgjedhur Trump mbështet marrëveshjen e armëpushimit Presidenti i zgjedhur Donald Trump përshëndeti marrëveshjene e armëpushimit në Rripin e Gazës, e cila përfshinë lirimin e një pjese të pengjeve përmes një postimi në rrjetin e tij social Truth Social. “Ne kemi një marrëveshje për lirimin e pengjeve në Lindjen e Mesme. Ata do të lirohen së shpejti. Faleminderit!”, thuhet në postimin e Presidentit të zgjedhur Trump. I dërguari i posaçëm i Presidentit të zgjedhur Trump iu bashkua këshilltarit të Presidentit Biden për Lindjen e Mesme në bisedimet e zhvilluara në Doha të Katarit. “Marrëveshja epike e armëpushimit u bë e mundur për shkak të fitores sonë historike në nëntor, që sinjalizoi të gjithë botën se administrata ime kërkon paqe dhe marrëveshje të nogociuara për të garantuar sigurinë e të gjithë amerikanëve dhe aleatëve tanë”, thuhet në postimin e zotit Trump. “Jam i gëzuar që pengjet amerikane dhe izraelite do të kthehen në shtëpi dhe do të bashkohen me familjet dhe të dashurit e tyre”. Presidenti i zgjedhur Trump u zotua javën e kaluar se nëse nuk do të arrihej një marrëveshje armëpushimi para fillimit të mandatit të tij, atëherë Hamasi do të përballej me pasoja të mëdha. Zoti Trump gjithashtu tha se i dërguari i tij për Lindjen e Mesme, Steve Witkoff do të vazhdojë “të punojë ngushtë me Izraelin dhe aleatët tanë për t’u siguruar që Gaza kurrë të mos bëhet strehë e sigurtë për terroristët”. Komentet e Biden erdhën pakë kohë pasi presidenti i zgjedhur Donald Trump në një postim në mediat sociale pretendoi se fitorja e tij në zgjedhje ishte ajo që solli marrëveshjen. Netanyahu: Marrëveshja e armëpushimit ende nuk është arritur Zyra e Kryeministrit izraelit Benjamin Netanyahu tha se marrëveshja e armëpushimit me Hamasin ende nuk është arritur dhe se detajet e fundit të kësaj marrëveshje ende janë duke u shqyrtuar. Njoftimi nga zyra e tij vjen pasi një numër ndërmjetësish thanë se Izraeli dhe Hamasi kishin rënë dakord për një marrëveshje armëpushimi në Gazë dhe lirimin e dhjetëra pengjeve pas luftës 15 mujore. Zyra e Kryeministrit Netanyahu tha përmes një deklarate se ka ende detaje të pazgjidhura dhe shpresonte se “zgjidhja e tyre do të përfundonte sonte” Marrëveshja pritet të ndërprej përkohësisht luftimet dhe jep shpresë për përfundimin e njërit prej konflikteve më të përgjakshme mes Izraelit dhe Hamasit, që destabilizoi tërë Lindjen e Mesme dhe nxiti protesta nëpër gjithë botën. Paraprakisht, zyrtarë pranë bisedimeve njoftuan më herët të mërkurën se Izraeli dhe Hamasi arritën marrëveshje për armëpushim në Gazë, pas konfliktit 15 muajsh me dhjetëra mijëra vikatima dhe që tronditi Lindjen e Mesme. Qeveria e Izraelit do të votojë për marrëveshjen ditën e enjte, sipas një zytari qeveritar izraelit. Marrëveshja, e cila ende nuk është shpallur zyrtarisht, parasheh një fazë fillestare të armëpushimit prej gjashtë javësh dhe përfshin një tërheqje graduale të forcave izraelite nga Gaza dhe lirimin e pengjeve që po mbahen nga Hamasi në këmbim të palestinezëve të burgosur nga Izraeli, i tha një zyrtar agjencisë së lajmeve Reuters. Marrëveshja vjen pas përpjekjeve të vazhdueshme për të ndërmjetësuar një marrëveshje nga Egjipti dhe Katari, me mbështetjen e Shteteve të Bashkuara. Marrëveshja u arrit në prag të inaugurimit të Presidentit të zgjedhur amerikan Donald Trump, që do të mbahen me 20 janar. Hamasi i tha agjencisë Reuters se delegacioni i tij u ka dorëzuar ndërmjetësve miratimin e grupit militant për marrëveshjen e armëpushimit dhe për kthimin e pengjeve. Marrëveshja parasheh futjen e 600 kamionëve me ndihma humanitare çdo ditë në Gazë , 50 prej të cilëve me karburant, ndërkohë që gjysma e tyre do të dërgohen në pjesën veriore të Gazës. Negociatat për fazën e dytë të marrëveshjes pritet të fillojnë para ditës së 16 të fazës së parë dhe pritet të përfshijnë lirimin e të gjitha pengjeve të mbetura, si dhe të ushtarëve izraelitë të marrë peng nga Hamasi. Negociatat do të trajtojnë edhe armëpushimin e përhershëm dhe tërheqjen e plotë të ushtarëve izraelitë.
Kryeministri Edi Rama bëri të ditur sot se investimet e reja në Shqipëri kapin shifrën mbi 1 miliard euro në një vit dhe shumica dërrmuese vijnë nga investitorë nga Evropa dhe Amerika.
Në rubrikën më të fundit të publikuar në rrjetet sociale ku i përgjigjet komenteve të ndjekësve, kryeministri Rama veçoi dy mesazhe: “Rama ka ngel veç me arab, pse nuk bën biznes me Evropën dhe Amerikën?” dhe “Ta kthej unë përgjigjen vëlla, sepse nuk duan, nuk kanë interes”.
“Nuk e di për kë e ka Fatosi që s’do, që s’ka interes për ne, për Evropën apo Amerikën, por për këdo ta ketë nuk ka diçka më larg të vërtetës. Duke filluar që nga marrëveshja e sotme ku ishim mes arabëve dhe italianëve. Italia është në Evropë, apo jo Simon, apo jo Fatos? E dini se sa biznes bëjnë investitorët e huaj në Shqipëri në një vit? Investime të reja mbi 1 miliard euro. E dini nga vijnë? Evropë dhe Amerikë shumica dërrmuese, mos të them të gjitha bashkë”, tha Rama.
Kryeministri Rama u shpreh se “po ne, qeveria, sa e sa projekte bëjmë me financime të huaja dhe e dini se nga vijnë? Nga Evropa thuajse të gjitha dhe para pak ditësh qeveria amerikane na njoftoi se e ka përzgjedhur Shqipërinë për një financim të madh në fushën e energjisë, që janë fonde të qeverisë amerikane”.
“Kjo është e vërteta, por është po ashtu e vërtetë siç kemi çuar në një nivel komplet tjetër marrëdhëniet me Evropën dhe Amerikën. Kemi forcuar shumë edhe marrëdhëniet me vendet arabe, sidomos me Emiratet dhe Arabinë Saudite dhe po afrohemi ndjeshëm edhe me Katarin, është një marrëdhënie pozitive, me një potencial të jashtëzakonshëm dhe krejt të pashfrytëzuar në të kaluarën. Përparimet e këtyre vendeve janë kolosale në çdo aspekt”, tha Rama.
“Faleminderit që u bëtë sebep për këtë shkëmbim sy m’sy për këtë temë! Nuk ka nevojë të më doni për të marrë informacionet që ju duhen. Merrni informacionet, pastaj doni kë të doni”, përfundoi Rama.
Shqipëria, Emiratet Arabe dhe Italia u bashkuan sot në një aleancë strategjike për energjinë e rinovueshme. Në Abu-Dabi, Emiratet e Bashkuara Arabe, u nënshkrua sot marrëveshja e investimit për lidhjen nënujore të rrjetit të shpërndarjes së energjisë me Italinë në detin Adriatik, si edhe për investimet në rritjen e prodhimit nga burimet e rinovueshme në Shqipëri, ndërmjet qeverisë së Republikës së Shqipërisë, qeverisë së Republikës së Italisë dhe qeverisë së Emirateve të Bashkuara Arabe.
Fraksion.com
