Poliklinika e Specialiteteve në Shkodër, me infrastrukturë moderne dhe shërbime të reja për rreth 200 mijë banorë

Poliklinika e re e specialiteteve në Shkodër, me një gamë të zgjeruar shërbimesh mjekësore, është një tjetër investim i buxhetit të shtetit për shëndetësinë që i shtohet qytetit, i cili ka nisur transformimin përmes projekteve madhore me impakt të drejtpërdrejtë në jetën e qytetarëve.

Me ambiente të transformuara, kushte  moderne dhe e pajisur me aparatura të reja diagnostikuese për rreth 200 mijë banorë, investimi prej 120 milionë lekë të reja, shtrihet në një sipërfaqe 1300 m², ku ofrohen 22 specialitete nga 14 që ishin më parë.

Kryeministri Edi Rama ishte sot në Shkodër, ku së bashku me ministren e Shëndetësisë dhe Mbrojtjes Sociale Albana Koçiu dhe kryetarin e bashkisë së Shkodrës, Benet Beci vizitoi mjediset e reja dhe u takua me mjekë dhe stafin drejtues të Poliklinikës.

Ministrja Shëndetësisë dhe Mbrojtjes Sociale Albana Koçiu, tha se Poliklinika e re e Specialiteteve është e ndërtuar tërësisht nga e para, jo vetëm me pajisjet, por edhe me infrastrukturë tërësisht të rehabilituar.

“Kjo është Poliklinika e Specialiteteve në Shkodër e ndërtuar tërësish nga e para, jo vetëm me pajisje, por edhe me infrastrukturën tërësisht të rehabilituar që tashmë zgjeron kabinetet dhe shërbimet. Ndërkohë zgjerohen kabinet e shërbimeve nga 14 shërbime që ofroheshin në këtë poliklinikë, aktualisht jemi në 22 shërbime. Pajisja DEXA është një pajisje që vlerëson densitetin e kockës dhe për gratë është shumë e rëndësishme. Vazhdojmë me grafinë, e cila është gjithashtu një pajisje diagnostikuese që i ka munguar qytetit të Shkodrës në poliklinikë, ofrohej vetëm në spital. Kemi kabinetin e mamografisë. Ndërkohë që një nga politikat për të diagnostikuar në kohë kancerin e gjirit për gratë, një fushatë që zhvillohet ne fakt gjatë muajit tetor, tashmë është bërë rutinë dhe ne kemi vendosur që të zhvillojmë diagnostikime falas me aparaturat e monografisë pa sistem referimi, në çdo qark të vendit, në çdo muaj. Në muajin janar është në Shkodër që diagnostikimi do të referohet drejtpërdrejtë, pa patur ato ecejaket në sistemin e referimit. – shpjegoi ministrja Koçiu, lidhur me aparaturat dhe risitë që ofrohen në kabinetet e poliklinikës.

Ndër të tjera, ministrja Koçiu tha se jo vetëm Poliklinika, por edhe Spitali i Shkodrës me buxhetin e vitit 2025 do të marrë vëmendje të shtuar.

“Ajo që duhet theksuar është që jo vetëm poliklinika, por edhe Spitali i Shkodrës me buxhetin e vitit 2025 do të marrë vëmendje të shtuar. Do të kemi rehabilitimin dhe rikonstruksionin jo vetëm të Maternitetit të Shkodrës, por edhe të disa shërbimeve të tjera si: Okulistika dhe disa shërbime të tjera, pneumologjia brenda spitalit të Shkodrës, duke e rritur dhe përmirësuar, jo vetëm kushtet e punës, po patjetër, motivuar stafin edhe ofruar shërbim cilësor për qytetarin”, u shpreh Koçiu.

“Ju falënderojmë shumë për investimin, për pajisjet e reja multifunksionale, të gjitha ekografitë janë të mbyllura për shërbimin ambulator. S’ka nevojë për të shkuar në spitale”, – u shpreh një prej mjekëve të stafit.

Një mjeke endokrinologe tha se “ishte shumë i nevojshëm rikonstruksioni dhe hapja e shumë kabineteve të tjera, meqenëse stafi ynë është shtuar goxha me prurjet e reja”.

Ndërkohë në Poliklinikë ka edhe shërbime që ofrohen për herë të parë, si shërbimi i fizioterapisë, shërbimi i shëndetit mendor, i toksikologjisë, etj.

“Risi tjetër është edhe zgjerimi i shërbimit me neurokirurgun e ri që është pas 30 vitesh dhe shërbimi i kirurgjisë maksilofaciale. Është shtuar gama e shërbimeve dhe është fuqizuar nga 14 në 22. Janë fuqizuar shërbimet e tjera nga dy mjekë për çdo shërbim, në mënyrë që qytetarët ta marrin shërbimin korrekt dhe të mos kemi radhë”, tregojnë ndër të tjera mjekët.

Fraksion.com