Hapja e grup-kapitullit rëndësi edhe gjeostrategjike, Komisionerja Kos në shqip: Urime Shqipërisë
Komisionerja për Fqinjësinë dhe Negociatat për Zgjerimin Marta Kos uroi në shqip qytetarët e Shqipërisë për përkushtimin dhe përfshirjen e të gjitha palëve politike në vend sa i takon negociatave për integrimin në Bashkimin Europian.
Në konferencën e përbashkët për shtyp me Kryeministrin Edi Rama në Bruksel, dhe ministrin e Punëve të Jashtme të Hungarisë, Péter Szijjártó, e cila mban Presidencën e Këshillit të BE), komisionerja Kos tha se vendimi i sotëm për hapjen e negociatave për grupkapitullin 6 “Marrëdhëniet me jashtë“, është një sinjal për Shqipërinë dhe rajonin e Ballkanit Perëndimor dhe më tej, që zgjerimi është prioritet për BE dhe se BE është përkushtuar për të marrë rezultate të tjera dhe të mund të plotësojë e përforcojë unionin europian në bazë të ndryshimeve gjeostrategjike që po ndodhin.
Rrugëtimin e deritanishëm të Shqipërisë, komisionerja e cilësoi si gur kilometrik, ndërsa vlerësoi edhe angazhimin e Hungarisë, si dhe shprehu besimin se edhe presidenca polake të vazhdojë këto përpjekje në të ardhmen.
Komisionerja Kos theksoi se zgjerimi ka rëndësi edhe gjeostrategjike.
“Ky vendim i sotëm është gjithashtu një sinjal për Shqipërinë dhe rajonin e Ballkanit Perëndimor dhe më tej, që zgjerimi është prioritet për BE dhe jemi të përkushtuar për të marrë rezultate të tjera dhe të mund të plotësojmë e përforcojmë bashkimin tonë, unionin tonë në bazë të ndryshimeve gjeostrategjike që po ndodhin. Sot në kontekstin ndërkombëtar hapja e negociatave për grupkapitullin 6 mban një veçanti, ka një rëndësi gjeostrategjike dhe përçon një sinjal gjeostrategjik. Është një njohje e qartë e harmonizimit të Shqipërisë me politikat e BE, si një partner i qëndrueshëm dhe i vlefshëm”, u shpreh Kos.
Sipas saj, temat e marrëdhënieve me jashtë forcojnë paqen, stabilitetin dhe sigurinë në BE dhe në kufijtë e BE, duke qenë si një aktor së bashku me Shqipërinë.
“Për sa i përket veprimit tonë të jashtëm, ne jemi për të mbrojtur interesin tonë dhe duke promovuar të gjitha vlerat e përbashkëta me vendosmëri të lartë”, shtoi ajo.
Kos siguroi Shqipërinë se do të mbështesë atë për të ndërtuar një të ardhme dhe të lulëzuar.
“Kam besim në vendosmërinë e Shqipërisë për të punuar fort për këto negociata dhe besojmë se mund të jeni të përkushtuar për të gjitha reformat për këtë proces. Duke parë konsensusin kombëtar për sa i përket negociatave, përfshirjen jo vetëm të qeverisë, jo vetëm Parlamentin, por edhe shoqërinë civile, çdo individ dhe çdo qytet, negociatat janë siç ju e keni thënë kryeministër, një proces që do të ketë një ndikim pozitiv për shoqërinë e ekonominë, duke sjellë përfitime për qytetarët gjatë procesit. Do të vazhdojmë të ndërtojmë së bashku një të ardhme të përbashkët dhe të lulëzuar. Urime Shqipërisë”, deklaroi komisionerja Kos.
Fraksion.com
