Tina Knowles, nëna e Beyoncé dhe ‘veprimi i çuditshëm’ kundër Jay-Z
Një stuhi akuzash të rënda ka goditur Jay-Z, reperin dhe producentin e njohur, i cili është përballur me akuza për përdhunimin e një vajze 13-vjeçare në vitin 2000, së bashku me Puff Daddy (Sean “Diddy” Combs). Ky skandal ka hapur një kapitull të ri dhe të trazuar në jetën personale dhe profesionale të artistit.
Në mes të këtij kaosi, Tina Knowles, nëna e Beyoncé dhe vjehrra e Jay-Z, u gjend në qendër të vëmendjes për një arsye krejt të papritur: një “like” në një postim në Instagram që raportonte për akuzat kundër reperit. Sipas Page Six, llogaria zyrtare e Tina-s kishte ndjekur dhe “pëlqyer” postimin, duke ngritur spekulime mbi qëndrimin e saj ndaj situatës.
Megjithatë, Tina reagoi shpejt në Instagram, duke deklaruar se llogaria e saj ishte “hakeruar.” Ajo shkroi: “Siç e dini të gjithë, unë nuk luaj me familjen time. Nëse shihni diçka të çuditshme, dijeni që nuk jam unë!” Kjo deklaratë, e shoqëruar me një citim nga Bibla, për të mbrojtur familjen e saj, nxiti reagime të ndryshme në rrjetet sociale. Disa përdorues e morën me ironi, duke sugjeruar se një justifikim si “e klikova gabimisht” do të kishte qenë më i besueshëm.
Akuzat kundër Jay-Z dolën në pah në kontekstin e një çështjeje më të gjerë kundër Puff Daddy, i cili është në paraburgim që nga marsi 2023 me akuza për trafikim njerëzor për qëllime seksuale. Sipas raportimeve, mbi 120 viktima, përfshirë 25 të mitur, kanë ngritur akuza ndaj tij, dhe procesi gjyqësor pritet të fillojë në maj 2025.
Në këtë kuadër, një grua ka deklaruar se në vitin 2000, pas një feste të MTV Video Music Awards, ajo u sulmua seksualisht nga Puff Daddy dhe Jay-Z. Avokatët e Combs i kanë cilësuar këto akuza si “manipulime publike të turpshme,” ndërsa Jay-Z i ka mohuar kategorikisht, duke i quajtur ato “të pabaza dhe të tmerrshme.”
Fraksion.com
