Dukaj: Hapet qendra për mbrojtjen kibernetike në Mal të Zi, i shërben të gjithë rajonit

Ministri i Administratës Publike në Malin e Zi, Marash Dukaj u shpreh sot në konferencën rajonale “Formësimi i së Ardhmes së GovTech”, duke e konsideruar takimin si një mundësi për shkëmbimin e ideve dhe përvojave për teknologjitë e avancuara dhe inteligjencën artificiale.

“Edhe Mali i Zi brenda një kohe të shkurtër ka bërë shumë punë në këtë drejtim, sidomos në aspektin e mbrojtjes kibernetike. Nëse nuk kemi këtë mbrojtje kibernetike nuk jemi të sigurt dhe ne e dimë se sa është sofistikuar lufta kibernetike, ndaj duhet të jemi bashkë dhe të unifikuar, kështu do të kemi më shumë rezultate. Jemi angazhuar që kjo të jetë pjesë e administratës publike në Mal të Zi, duke krijuar edhe drejtori të veçanta, ndërsa kemi hartuar raporte rëndësishme në nivel rajonal dhe global.

Pjesëmarrja jonë në aktivitete, trajnimi i kuadrove që merren me këto çështje, ne i kemi dhënë një rëndësi të veçantë. Mali i Zi vazhdon të përcjellë të gjitha trendet dhe besoj se përmes një partneriteti mes vendeve të Ballkanit Perëndimor mund të përballemi me sfidat të cilat sjellin përmirësim në mbulimin digjital. Na gëzon fakti që Shqipëria ecën me këto hapa, Mali i Zi nuk është akoma afër, por jemi duke punuar shumë në këtë drejtim, por çdo ditë po promovojmë shërbime të reja digjitale, duke forcuar mbrojtjen kibernetike”, tha ai.

Ministri i Administratës Publike në Malin e Zi shtoi se ditën e djeshme, së bashku me partnerët francezë dhe sllovenë, hapën qendrën për mbrojtjen kibernetike, që do të jetë jo vetëm për Malin e Zi, por për të gjithë rajonin, për trajnimin e kuadrove për sigurinë kibernetike.

“Një tjetër hap i rëndësishëm është miratimi i ligjit për mbrojtjen e informacionit, që e kemi përshtatur me direktivat e BE-së, dhe ne bëhemi shteti i vetëm në rajon që e kemi përshtatur si direktivë dhe kjo i paraprin disa zhvillimeve të tjera të rëndësishme”, përfundoi Dukaj.

Fraksion.com