Rama: Akademia Politike e Partisë Socialiste, një fidanishte që ka nisur të japë frytet e para
Kryetari i Partisë Socialiste njëherësh Kryeministri Edi Rama ndau certifikatat për pjesëmarrësit në Akademinë Politike të Partisë Socialiste.
Rama theksoi se, Akademia Politike e Partisë Socialiste është një fidanishte që ka nisur të japë frytet e para.
“Më vjen mirë që sot jemi së bashku këtu për të mbyllur një cikël dhe për të hapur një cikël tjetër, dhënien e certifikatave të pjesëmarrjes për anëtarët e ciklit të parë dhe cikli i dytë në vijim me anëtarët e rinj të Akademisë Politike”, theksoi Rama.
“Jam vërtetë i inkurajuar nga cikli i parë edhe nga studentët dhe studentet e Akademisë në ciklin e parë sepse kryesorja, i gjithë procesi është zhvilluar me dëshirë, është zhvilluar me përkushtim dhe me sa unë kam arritur të kuptoj, edhe pse në një distancë të caktuar, pas kryerjes së këtij procesi të gjithë pjesëmarrësit kanë një kuptim më të gjerë, edhe një vetëdijesim më të madh, qoftë për natyrën e politikës, qoftë për vështirësitë dhe patjetër edhe për domosdoshmërinë që politika të shihet si një mjet në funksion të ndryshimit dhe si një instrument për të bërë së bashku gjëra që përndryshe, individualisht, njerëzit nuk i bëjnë dot”, tha Rama.
“Besoj dhe uroj që disa ndër ju të vazhdojnë të përpiqen edhe që, jo të gjithë, se një pjesë e juaja patjetër që do të dorëzohen, po jo të gjithë dorëzohen. Nëse do të ndodh kështu do të jetë një gjë shumë e mirë për ata që nuk do të dorëzohen. Por do të jetë një gjë shumë e mirë edhe për shoqërinë, do të jetë një gjë shumë e mirë padiskutim edhe për Partinë Socialiste, sepse është e domosdoshme që më shumë të rinj, më shumë forca të freskëta të përfshihen drejtpërdrejt në hapësirën vendimmarrëse të PS-së”, theksoi Rama.
Fraksion.com
