Rama në OKB: Kosova realitet i pakthyeshëm ndërkombëtar, s’duhet mbajtur peng nga askush

Kryeministri Edi Rama deklaroi sot se Kosova është një realitet i pakthyeshëm.

Në fjalën e tij, në sesionin e 79-të të Asamblesë të Përgjithshme të OKB, në Nju-Jork, Rama u bëri thirrje 5 vendeve anëtare të BE-së, që ende nuk e kanë njohur Kosovën, ta njohin atë dhe të mos e mbajnë peng anëtarësimin e saj në institucionet ndërkombëtare.

“Në rajonin tonë, pas më shumë se çerek shekulli plagët nga shpërbërja e ish-Jugosllavisë kanë nevojë të shërohen, por kemi parë përparim”, deklaroi Rama.

Rama shtoi se bindja e palëkundur e Shqipërisë është të shohë të shkuarën me sytë e së ardhmes dhe një të ardhmen me sytë e së shkuarës.

Agresioni rus kundër Ukrainës, theksoi ai, duhet të na shërbejë të gjithëve si zile e përhershme alarmi.

Kryeministri theksoi se vendet e Ballkanit Perëndimor duhet të punojnë pareshtur mes tyre dhe me aleatët e partnerët për tu siguruar që kthimi në të shkuarën të jetë i paimagjinueshëm. Kosova, u shpreh Rama, është sot realitet i pakthyeshëm mes 6 vendeve të Ballkanit Perëndimor me perspektivë të qartë europiane.

“Çdo paralele e hequr artificialisht mes Kosovës e Ukrainës ka për synim të hutojnë këdo në këtë ndërtesë apo opinionin, por kurrë nuk mund të arrijnë të zbehin të vërtetën se Kosova është pjesë e pandashme e realitetit ndërkombëtar dhe anëtare aspirantë e komunitet euroatlantik. Nuk duhet të mbahet peng nga askush, duke nisur nga grupi i 5 shteteve anëtare të BE-së që ende nuk e njohin Kosovën”, deklaroi Rama.

Kryeministri përsëriti thirrjen ndaj Rusisë për të ndalur Luftën në Ukrainë.

Fraksion.con