“Përfitoi prona në Vuno”, Rama iu përgjigjet akuzave të PD: Propagandë nga skllevërit e ballkonit. Bujrum në gropën që hapën vetë!
Kryeministri Edi Rama ka reaguar pas akuzave të Partisë Demokratike se familjarët e tij kanë marrë toka në Vuno të Himarës. Ivi Kaso doli në një deklaratë për mediat sot duke akuzuar familjarët e Ramës se kanë grabitur 22.4 hektarëve tokë në Vuno.
Përmes një mesazhi në X kryeministri thekson se kjo është një përpjekje e dëshpëruar nga opozita. Rama shkruan po hidhet baltë dhe kjo histori po propagandohet nga skllevërit e non gratës në ballkon.
Kryeministri paralajmëron një tjetër padi në gjyq për këtë çështje, ndërsa thekson se duzina e trashëgimtarëve të pronave të stërgjyshit në Vuno të Himarës, nuk i ka marrë ende certifikatat e pronësisë. Ai nuk i ka kursyer akuzat për ish-kryeministrin Berisha, ndërsa paralajmëron padi për rastin në fjalë, pas pretendimeve se ai përfitoi pronë në Vuno.
Reagimi i plotë i kryeministrit Edi Rama
Përpjekja e dëshpëruar për të bërë një paralele të pamundur, mes pushtetit të përdorur për veten e për familjen dhe pushtetit të vënë në dispozicion të të gjithëve, ku edhe vetja, familjarët apo fisi yt trajtohen njësoj si të gjithë, është një përpjekje që e përshëndes me kënaqësi, sepse aq sa ç’është e neveritshme si gjithnjë kur hidhet baltë mbi familjen time për të luftuar në fakt me mua, aq është këtë herë edhe e mirëseardhur për të bërë dallimin si nata me ditën mes agresorëve të familjes time dhe meje si kundërshtar i papërkulshëm i tyre!
Të gjitha faktet që e ekspozojnë këtë përpjekje, si një lëtyrë të nxjerrë nga kanalet e ujrave të zeza mediatike në Tiranë e në Athinë, e tashmë të propaganduar nga skllevërit e ballkonit Non Grata, do të jenë pjesë e padisë së radhës në gjyq për këta të paudhë që në fakt, po i paguajnë me një vetëdiskreditim e vetëturpërim shembullor në sytë e shqiptarëve paudhësitë e panumërta, që i kanë bërë këtij vendi e këtij populli kur kishin edhe gurin edhe arrën, në duart e tyre të mbrapshta e të pista.
Por për publikun ka vetëm një fakt. Sot e gjithë ditën, duzina e trashëgimtarëve të pronave të stërgjyshit tonë në Vuno të Himarës, njësoj si plot trashëgimtarë të tjerë të kësaj zone – ku sapo isha së bashku me kryebashkiakun tonë të së dielës së ardhshme, Vangjel Tavon – nuk i ka marrë ende çertifikatat e pronësisë. Sepse unë, ndryshe nga kundërshtarët e mi pa din e pa iman, nuk jam i asaj kategorie përfaqësuesish të popullit, që tjetër thonë për njerëzit e tjetër bëj për vete.
Kështu që faleminderit që e hapën këtë gropë në publik për mua dhe bujrum le të hidhen vetë brenda, si zakonisht, por këtë herë me të mirën e madhe që populli do ta shohë dallimin e madh, si në një pasqyrë ku vetëm qorrat me qimen e syrit në tru mund të mbeten pa e kuptuar!
Fraksion.com
