“Ndalni spekulimet që dëmtojnë punën tonë”, SPAK: Nuk ka pasur asnjë aksion brenda natës!

Prokuroria e Posaçme Kundër Krimit të Organizuar dhe Korrupsionit, SPAK, ka reaguar sot me një njoftim për shtyp, ku bën thirrje të ndalen spekulimet dhe konfirmon se nuk ka pasur asnjë operacion gjatë natës siç u raportua.

“Lidhur me lajmet e publikuara dje në disa nga mediat: SPAK po vijon një sërë hetimesh për të luftuar korrupsionin dhe mbrojtjen e publikut. Nuk ka pasur asnjë operacion brenda natës dhe ju kërkojmë me mirësjellje të shmangin spekulimet që mund të dëmtojnë punën tonë”, thuhet në njoftimin për mediet.

“Në momentin që do të kemi njoftime për të ndarë me median padyshim do të viheni në dijeni”, thuhet në reagimin e SPAK.

Mbrëmjen e djeshme në një sërë mediash u spekulua se Gjykata me kërkesë të SPAK-ut ka dhënë disa masa sigurie për inceneratorin e Tiranës.