Policia e Kosovës konfiskon armë në veri të vendit

Policia e Kosovës njoftoi të premten në mbrëmje se ka konfiskuar një sasi armësh gjatë një operacioni në veri të vendit, të cilat sipas saj, lidhen me dy pjesëtarë të grupit që kreu sulmin e 24 shtatorit të vitit të kaluar në fshatin Banjskë, ku u vra një oficer i policisë dhe tre sulmues të armatosur.

“E konsiderojmë që këto dy lokacione kanë emra, do të thotë janë të lidhur me lokacionin e parë me Marjan Radojeviç ndërsa lokacioni i dytë lidhet me Zharko Cvetkoviç, që të dytë janë në kërkim për rastin e Banjskës. Ne konsiderojmë që ky armatim dhe këto pajisje gjinden aty për një kohë më të gjatë”, tha gjatë një konference shtypi zëvendësdrejtori i policisë në Mitrovicën e Veriut, Veton Elshani.

Policia tha se operacioni është kryer në bashkëpunim me Agjencinë e Zbulimit dhe përgjatë tij janë konfiskuar “30 copë, mjet i dyshuari shpërthyes TM 100, armë të gjata, revole, fishekë dhe pajisje tjera”.

Ministri i Punëve të Brendshme Xhelal Sveçla shkroi në rrjetet sociale se në veri të vendit janë konfiskuar sërish armë, eksplozivë e municion dhe kjo sipas tij “falë vigjilencës së shtuar të institucioneve dhe vendosmërisë për asgjësimin e secilit element kriminal dhe tendencës destabilizuese që vjen nga Beogradi”.

Më 24 shtator të vitit 2023 një grup serbësh të armatosur sulmoi policinë e Kosovës në fshatin Banjskë, në një ngjarje që ngriti shqetësime për qëndrueshmërinë në rajon.

Kosova akuzon Serbinë për organizimin e sulmit dhe zyrtarët në Prishtinë kanë paralajmëruar mbi rreziqet nga përsëritja e sulmeve të dhunshme nga siç thuhet “strukturat kriminale të Serbisë”, ngjashëm me sulmin e 24 shtatorit.

Beogradi zyrtar ka mohuar çfarëdo lidhje me grupin e armatosur duke paralajmëruar ndjekjen penale të ish zyrtarit lokal serb Milan Radoiçiç i cili mori përsipër përgjegjësinë për sulmin.

Fraksion.com