Rrumbullaku pret kreun e INTERPOL: Bashkë kundër krimit të organizuar

Rrumbullaku falënderoi presidentin e INTERPOL-it për vizitën dhe mundësinë që Policia e Shtetit të mikpriste Konferencën e 51-të Rajonale të INTERPOL-it për Europën, që zhvilloi punimet në Tiranë. Gjatë takimit, e njohu Ahmed Naser Al-Raisi me sfidat e Policisë së Shtetit dhe angazhimin e saj për garantimin e rendit, sigurisë dhe goditjen e krimit.

Në mënyrë të veçantë, Rrumbullaku nënvizoi bashkëpunimin shumë të mirë mes Policisë së Shtetit dhe INTERPOL-it. “Ky bashkëpunim, i konsoliduar në shkëmbim informacioni në kohë shumë të shpejtë dhe operacione të përbashkëta, duhet të shkojë edhe më tej, duke u fokusuar edhe në përpjekjen madhore të Policisë së Shtetit dhe agjencive ligjzbatuese të Shqipërisë për vendosjen para drejtësisë të personave në kërkim ndërkombëtar”, u shpreh ai, duke shtuar se, për Policinë e Shtetit është prioritet shumë i rëndësishëm dorëzimi në duart e drejtësisë i personave të kërkuar për krime të rënda dhe me rrezikshmëri të lartë, si për Shqipërinë, ashtu edhe për vendet ku ata strehohen.

Presidenti i INTERPOL-it, Ahmed Naser Al-Raisi, duke nënvizuar organizimin e shkëlqyer dhe suksesin e Konferencës së 51-të Rajonale të INTERPOL-it për Europën, që zhvilloi punimet në Tiranë, vlerësoi arritjet e Policisë së Shtetit shqiptar dhe energjinë, angazhimin e profesionalizmin e saj. Ai u shpreh se, bashkëpunimi, ndërveprimi dhe shkëmbimi intensiv i informacioneve, si në aspektin dypalësh dhe në atë shumëpalësh, do të ndihmojnë së tepërmi në vendosjen përpara drejtësisë të personave të kërkuar ndërkombëtarisht.

Policia e Shtetit dhe INTERPOL-i ranë dakord të rrisin bashkëpunimin dhe programet e përbashkëta për të luftuar krimin e organizuar ndërshtetëror në të gjitha format e tij, në të gjithë rajonin dhe më gjerë.