Shpëtohen 4 turistë në Theth, Peleshi: FA dhe helikopteri Cougar në gatishmëri

Ministri i Mbrojtjes Niko Peleshi, tha sot se shpëtimi i katër turistëve gjermanë që ishin bllokuar në zonën e Thethit, u realizua edhe falë ndërhyrjes së Forcave të Armatosura, si dhe angazhimit të helikopterit Cougar.

Peleshi në një postim në rrjetet sociale, i bëri thirrje turistëve dhe të apasionuarve të natyrës të shmangin terrenet dhe zonat e panjohura.

“Një grup turistësh të huaj janë rrëzuar në vendin e quajtur Qafa e Pejës, në Theth, në rrugën që lidh Thethin me Plavën e Gucinë. Sipas informacioneve njëri prej tyre nuk është në gjendje të mirë shëndetësore. Për shkak se transporti drejt Tiranës me rrugë tokësore ishte i pamundur është angazhuar helikopteri i Emergjencave Civile EC 135. Pas tij është dashur ndërhyrja e helikopterit Cougar për tërheqjen e të lënduarit me vinç”, shkruan Peleshi.

“Forcat e Armatosura janë dhe do të vijojnë të jenë në gatishmëri për çdo nevojë që ka komuniteti, por u bëjmë thirrje të gjithë qytetarëve që dëshirojnë të eksplorojnë bukuritë e vendit, veçanërisht turistëve që të bëjnë kujdes gjatë sezonit veror, për të shmangur situata të tilla, në zona me terren të panjohur dhe të vështirë!”, përfundon Peleshi.

Fraksion.com