Manjati i medias Rupert Murdoch martohet për herë të pestë në moshën 93-vjeçare

Manjati i medias Rupert Murdoch është martuar për herë të pestë me një biologe molekulare me origjinë ruse.

Murdoch, 93 vjeç dhe Elena Zhukova, 67 vjeç, shkëmbyen betimet në një ceremoni në pronën e tij në Bel Air, Kaliforni të shtunën, më pak se tre muaj pasi çifti njoftoi se ishin fejuar.

Tabloidi i Murdoch, The Sun, publikoi fotografi të dhëndrit të veshur me një kostum të zi dhe kravatë të verdhë dhe nuses të veshur me një fustan të bardhë.

Të ftuarit në ceremoni përfshinin Robert Kraft, pronar i ekipit të futbollit të New England Patriots në SHBA dhe shefi ekzekutiv i News Corp, Robert Thomson.

Martesa e katërt e Murdoch me modelen dhe aktoren Jerry Hall përfundoi në divorc në vitin 2022.

Miliarderi ishte i martuar më parë me drejtuesen e televizionit me origjinë kineze, Wendi Deng, gazetaren skoceze-australiane Anna Torv dhe stjuardesën australiane Patricia Booker.

Murdoch, i cili ka gjashtë fëmijë, vitin e kaluar njoftoi fejesën e tij me gazetaren e radios, Ann Lesley Smith, përpara se të anulonte dasmën disa javë më vonë.

Murdoch, i cili ndërtoi një perandori globale mediatike pasi trashëgoi gazetën ‘The News’ me bazë në Adelaide në vitet 1950, në nëntor dha dorëheqjen si kreu i kompanisë mëmë të ‘Fox News’ dhe zotërimeve të tij mediatike ‘News Corp’.

Dorëheqja e befasishme e Murdoch i dha djalit të tij, Lachlan, kontrollin e medias, e cila përfshin Fox News, The Times of London dhe The Wall Street Journal.

Fraksion.com