Rama: Nuk mbrojmë askënd, pa PS nuk do të kishte SPAK
Kryeministri Edi Rama deklaroi sot se PS i ka shpallur luftë korrupsionit, ndërsa shtoi se “po të mos ishte PS nuk do të ishte SPAK”.
Në një intervistë televizive, Rama foli për arrestimet e SPAk ndërsa theksoi se “mazhoranca ka ngritur sisteme që kanë ulur korrupsionin në vend”.
I pyetur mbi ministrat dhe drejtorët e akuzuar apo dënuar për korrupsion, Rama u shpreh se PS nuk mbron asnjë person që është i përfshirë në korrupsion.
“Unë kam punuar me mbi 40 ministra dhe nga këta ministra janë 3 apo 4 në 10 vite. Partia Socialiste vetëm forcohet dhe vetëm zgjerohet. Unë jam përgjegjës për faktin që ky korrupsion po evidentohet, sepse po të mos ishte Partia Socialiste nuk do të ishte SPAK”, tha ai.
Sipas Ramës, “nuk ka sistem korrupsioni të ngritur, sepse po të kishte ashtu siç interpretohet nuk do të ishte Shqipëria në tavolinën e negociatave. Komisioni Evropian është institucioni i vetëm që ka dhjetëra e qindra persona të angazhuar që merren 24/7 me faktet. Nuk merren me faktet 24/7 as televizionet, as gazetat, as partitë, asnjeri. Ata merren dhe ata e dinë ekzaktësisht çfarë është çfarë”, tha ai.
Kryeministri theksoi se PS ka ngritur sisteme dhe po vazhdon të ngrejë sisteme që e kanë ulur korrupsionin.
“Nuk është ngritur korrupsioni. Kjo shpjegohet me faktin se ka një luftë të thelluar kundër korrupsionit dhe këto qe po dalin janë rezultat i kësaj lufte. Kjo është një arsye për të thënë bravo Partisë Socialiste. Sepse Partia Socialiste është e para dhe e vetmja forcë politike në historinë e shtetit shqiptar që nga 1912 që ka hequr nga kontrolli politikë dhe që thotë shumë thjesht: “Nuk dua ta di fare a je zëdhënësi, a je shoku, a je tjetri ,a je tjetri… Në këtë pikë nuk ka shokë, nuk ka zëdhënës, nuk ka asgjë tjetër por ka një ndarje të menjëhershme, kaq”, shtoi ai.
Kryeministri theksoi se do ta konsideronte përgjegjësi sikur mos të ishte kapur asnjë ish-ministër i Partisë Socialiste, asnjë nga drejtorët që janë kapur, por të ishin vënë para drejtësisë vetëm ata që janë të krahut tjetër.
“Kjo do të ishte përgjegjësi shumë e madhe politike. SPAK s’po thotë asgjë, përveçse po identifikon dhe po godet ashtu siç duhet të bëj raste të caktuara, ndërsa përgjithësimi që si këta që u kapën janë të tërë e bëni ju. E vërteta është në fakt nëse do të ishte kështu nuk do kishim kursyer gati 1 miliardë euro nga tenderat, nuk do kishim një numër operatorësh ekonomikë që fitojnë gara gati 3-fishin e atyre që fitonin para se të vinim ne”, tha ai.
Fraksion.com
