“Do të digjemi, nëse prekni shtëpitë tona”, shemba e banesave për projektin Thumanë-Kashar: familjarët hipin në tarracë me bidona me benzinë

Teksa sot është njoftuar se do t’u shemben banesat, 6 familje, në përbërje 32 persona, janë duke protestuar dhe kundërshtuar vendimin, pasi pronat e tyre preken nga autostrada Thumanë-Kashar. Bëhet fjalë për disa banesa në zonën e njohur si Ura e Limuthit. Ata theksojnë se nuk janë dëmshpërblyer dhe nuk janë në skemën e dëmshpërblimit.

Disa prej familjareve kanë hipur tarracën e njërës prej shtëpive dhe kërcënojnë me hapa ekstreme.

Gazetari Osman Stafa raporton për BalkanWeb se familjarët kanë paralajmëruar se do të spërkaten me benzinë dhe do t’i vënë flakën vetes nëse nuk merren parasysh kërkesat e tyre.

Siç shihet nga pamjet, disa zonja shfaqen me shishe plastike të mbushura me benzinë, ndërsa kërcënojnë se do t’i vënë flakën vetes nëse nis shembja e banesave.

Ata sqarojnë se nuk do të pranojnë që të shemben banesat e tyre, pasi nuk janë përfshirë në skemën e dëmshpërblimit. Mes personave që kërcënojnë me aktin ekstrem, ka edhe të mitur.

IKMT sapo ka mbërritur dhe është në pritje.

Fraksion.com