“Vrasja e Xhuvanit e paplotë”, përplasjet gjykatë- ekspert: S’keni parë pamjet! Kush qëlloi i pari

Teksa sot po mbahet seanca gjyqësore për vrasjen e biznesmenit Pjerin Xhuvani, togat e zeza kanë arritur në përfundimin se akti i rindërtimit të skenës së krimit në Elbasan, është i paplotë. Në seancën në fjalë që po mbahet në Apel, ku të pranishëm është Arbër Paplekaj, janë marrë në pyetje tre ekspertët Arjan Hako, Shpëtim Budo dhe Artan Rexhepi, të cilët janë pyetur nëse e konsideronin aktin të plotë. Në sallë ka pasur debate për faktin nëse këto pamje janë shqyrtuar apo jo, ndërsa rezulton se ekspertët nuk i kanë parë fare pamjet.
Gazetarja Klodiana Lala ka siguruar për BalkanWeb dhe debatet mes të pranishmëve në seancë.

Pasi urdhëroi rindërtimin e skenës së ngjarjes, për riekspertim, Gjykata e Apelit dëgjoi për gati gjashtë orë palët dhe insistimin e të akuzuarit që kërkoi rindërtim të ngjarjes për të kuptuar mekanizmin se çfarë ndodhi atë ditë, vendosi të kryhet ekspertim dhe rindërtim tekniko-balistik për të zbuluar se kush qëlloi tjetër ditën e ngjarjes. Ekspertët kanë vendosur në dispozicion të gjykatës në rrugë elektronike aktin tekniko-balistik të kryer në vendin e krimit. Sakaq, avokati i Paplekajt nga ana e tij ka kërkuar kohë që të shqyrtojë këtë akt. “Gjykata t’i japë rëndësi faktit jo afateve”, tha avokati.

Ndërkohë, prokurori Gent Xholi theksoi se akti është voluminoz dhe se e kishte marrë atë vetëm para gjysmë ore. “S’mund ta shqyrtoj brenda një kohe të shkurtër”, tha ai. Gjykata nga ana tjetër ka pyetur ekspertët Arjan Hako, Shpëtim Budo dhe Artan Rexhepi nëse e konsiderojnë aktin të plotë. Kësaj pyetje, eksperti Hako tha se; “për pamjet filmike jemi shprehur për aq sa konstatojmë”, ndërsa shton

“Për mua po (akti është i plotë), sepse s’kam pajisje për të ekzaminuar pamjet.”. Po ashtu ekspertët janë shprehur se nuk kanë patur kohë për të ekzaminuar pamjet filmike, ndërsa thuhet se nuk është përcaktuar se kush qëlloi i pari. Eksperti Artan Rexhepi tha se ka kërkuar 1 muaj e gjysmë kohë për të parë pamjet.

Ekspertiza vlerësohet e paplotë, sepse ekspertët thonë se jemi bazuar në të dhëna të pasakta të vendngjarjes fillestare dhe vendngjarja ka qenë e kontaminuar.

Gjykata: Ku janë qitësit? Nga ku kanë qëlluar?

Artan Rexhepi: Për mendimin tim, ngjarja ka probleme. Distanca e qitjes ka probleme.

Gjykata: Ndaj jeni thirrur si ekspertë ta përcaktoni.

Eksperti Budo: Sipas meje akti është i plotë. Mund të bëjmë dhe plotësime të tjera. Nuk jam ekspert për pamjet filmike dhe nuk e përcaktoj dot vendndodhjen. Kam 40 vjet përvojë. Nuk kam bërë ndonjëherë akt ekspertimi të pamjeve filmike për të konstatuat vend vendndodhjen apo mekanizmin e krimit. Nga pamjet vizuale se përcaktoj dot vendndodhjen. Një tjetër element i paqartë nga ekspertiza është fakti se ata nuk kanë përcaktuar as vendndodhjen e punonjëses së policisë, Xhensila Sota, e cila mbeti e plagosur në vendin e ngjarjes.

Artan Rexhepi: Jam i mendimit që të bëhet një akt i dytë mbi pamjet filmike. Vendngjarja është e kontaminuar.

Prokurori: Njeri ekspert thotë ky akt s’ka vlera. Është akti i saktë? Çfarë duhet të lexojmë nga ky akt?

Prokurori Gent Xholi pyet ekspertët: A është i saktë apo jo akti? Të bëjmë apo jo pyetje?
Ekspertët: Jo. Duhet bërë akt i dytë. Nuk dua të hedh baltë mbi punën e askujt, por është bërë mbi bazën e akteve që nuk pasqyrojnë realitetin.

Eksperti Hako: Këqyrja e vendit të ngjarjes ka shumë mangësi. Një akt i ndërtuar mbi këto të dhëna do të ketë probleme, por është i ndërtuar mbi ato të dhëna që kishim. Si pikë referimi ne morë përqendrimin më të madh të gëzhojave, por aty ka edhe gëzhoja të tjera. Unë nuk e di se çfarë soft-i ka kolegu, por ne nuk kemi bërë ndonjëherë këqyrje përmes pamjeve filmike. Nuk mund të flasim me saktësi për distancën në metra mes qitësit 1 dhe qitësit 2. Ne kemi vendosur maksimumin, 11 metër, por mund të jetë edhe më afër.

Ndërkohë, të pandehur për këtë ngjarje që ndodhi më 21 prill të vitit 2023, janë dhe dy ish-nëndrejtorët e Policisë së Elbasanit, Nikollaq Palla dhe Albert Nushi si dhe 6 efektive të Shqiponjave.

Fraksion.xom