Balluku: 4 aeroporte dhe korridoret rrugore në funksion të zhvillimit të turizmit

Zëvendëskryeministrja, njëherësh ministre e Infrastrukturës dhe Energjisë, Belinda Balluku, e  cilësoi Konferencën për Investimet dhe Zhvillimin Ekonomik të Europës e Shqipërisë, organizuar së bashku me Organizatën Botërore të Turizmit, si një mundësi domethënëse për promovimin e Shqipërisë dhe shkëmbimin e eksperiencave mes vendeve në fushën e turizmit.

Duke marrë fjalën në këtë Konferencë, Balluku theksoi se, turizmin në Shqipëri është kthyer në një industri të rëndësishme që jep një kontribut të rëndësishëm në rritjen ekonomike të vendit.

Sot Shqipëria, tha ajo, renditet një ndër vendet e para për sa i takon numrit të turistëve.

Duke u ndalur në investimet në infrastrukturë si katalizator të zhvillimit të turizmit, Balluku tha se,  “në 2018 kur qeveria vendosi në atë kohë të nisë një strategji për zhvillimin, me të vërtetë pati shumë skeptikë, kjo ndodh shpesh në politikë, të cilët thonë se pse duhen aeroportet e reja në një vend, kur edhe i vetmi që ndodhej në Tiranë pothuajse ishte në 50 % të kapaciteteve. Por asgjë nuk është e rastësishme nga planet dhe projektet e mirëplanifikuar që sot përkthehet në rezultate”.

“Sot në Shqipëri nga një aeroport ndërkombëtar që kishim në 2018, ne ndërtuam në veri të vendit, aeroportin e Kukësit dhe për pak muaj do të kemi aeroportin më të madh në Ballkan, Aeroportin Ndërkombëtar të Vlorës, i cili është projektuar për fluturime transoqeanike, por  për të akomoduar dhe flukset ndërkombëtare”, u shpreh ministrja.

Balluku theksoi gjithashtu se po punojnë së bashku me ministrinë e Turizmit dhe se kanë nisur procesin për aeroportin e ri që do të ndërtohet në Gjirokastër, duke e mbyllur kurorën me katër aeroporte. Pas një studimi me Ministrinë e Turizmit, kemi marrë një vendim të ri për të nisur procesin për një aeroport në jug të vendit duke e mbyllur kurorën e avioacionit civil, në Kukës, në Tiranë, në Vlorë dhe më pas në Gjirokastër, një  nga zonat më interesante për turizmin”, u shpreh Balluku.

Balluku theksoi se investime të rëndësishme po zhvillojnë korridoret rrugore si ura të zhvillimit ekonomik dhe turizmit që ndërlidhin Ballkanin Perëndimor me Europën.

“Kemi nisur punën me ndërtimin e Korridorit të tetë, që për Maqedoninë e Veriut, Bullgarinë dhe Italinë e Veriut është një investim i rëndësishëm jo vetëm për transportin rrugor por edhe ndërlidhjen dhe të sigurisë. Nga ana tjetër Korridori Blu që lidh Kroacinë- Malin e Zi-Shqipërinë- Greqinë, tashmë ka nisur dhe gjatë këtij viti ne do të dorëzojmë një nga pjesët më të rëndësishme të këtij korridori, Thumanë-Kashar e cila do të lidh Tiranë- Aeroportin Ndërkombëtar dhe pjesën veriore të Shqipërisë, për të lehtësuar kështu njëherë e mirë trafikun rrugor”, u shpreh Balluku.

Ndërkaq tha ajo, për pak javë do të hapet Tuneli i Llogorasë që do të hapë një derë të re aksesi në jugun e bukur të Shqipërisë.

“Të gjithë ata që do të ulen në aeroportin e Vlorës, do të kenë mundësinë të kalojnë përmes tunelit të Llogorasë dhe për 7 minuta kalojnë nga Dukati në Palasë, duke aksesur lehtësisht bukuritë turistike në jugun e Shqipërisë”, vuri në dukje Balluku.

Duke iu drejtuar pjesëmarrësve në Konferencën e Investimet dhe Zhvillimin Ekonomik të Europës e Shqipërisë, Balluku tha se, “askush më mirë se ju që vizitori Shqipërinë nuk mund të faktojë më mirë se kushdo, transformimin e Shqipërisë dhe zhvillimin e saj që po njeh çdo herë e më shumë një fluks të shtuar të turistëve dhe vizitorëve”.

Në projeksionet tona, vijoi ministrja parashikojmë mbi 14 milionë turistë për vitin 2024, por shifrat e muajve të parë të këtij viti me rritje dyshifrore na bëjnë të besojmë se numri i turistëve këtë vit do të jetë përtej parashikimeve, ndaj dhe jemi angazhuar me të gjitha kapacitetet tona në të gjithë sektorët, për të mbështetur mbarëvajtjen e turizmit dhe të ekonomisë.

Në këtë kontekst, theksoi ajo, vëmendje të shtuar së fundi po merr mbështetja për kapitalin njerëzor. Qeveria Shqiptare është e angazhuar dhe ka në fokus mbështetjen e kapitalit njerëzor edhe në fushën e shërbimeve dhe hotelerisë si faktori që mbështetet çuarjen përpara të industrisë së turizmit në Shqipëri.

Fraksion.com