Çuçi: Komisioni i Posaçëm për Dezinformimin nuk është për përdorim të brendshëm

Kryetari i grupit parlamentar të Partisë Socialiste, Bledi Çuçi u shpreh sot se Komisioni i Posaçëm për Dezinformimin nuk është një mekanizëm për qëllimet e  brendshme politike, prandaj sipas tij, “këtu të gjitha palët duhet të jenë bashkë”.

Konferenca e Kryetarëve u mblodh sot për të vendosur ngritjen e Komisionit të Posaçëm Parlamentar me fokus koordinimin dhe mbikëqyrjen e të gjitha përpjekjeve institucionale për të luftuar dezinformimin dhe format e tjera të ndërhyrjes së huaj në proceset demokratike në Shqipëri.

“Më vjen keq që kolegët e opozitës shohin me paranojë çdo iniciativë të mazhorancës. Por nuk është ky rasti”, tha Çuçi.

Sipas tij, “për shkak të zhvillimeve nëpër botë, vlerat e demokracisë perëndimore janë më të kërcënuara”.

“Dezinformimi është një nga instrumentet që po përdoret gjerësisht për të cenuar vlerat demokratike. Këtë nuk e themi ne, por e thotë gjithë bota perëndimore. PE pati një rezolutë dhe një komision të posaçëm për këtë punë. Ky nuk është një mekanizëm për qëllimet tona të brendshme politike, prandaj këtu duhet të jemi bashkë”, tha Çuçi.

Sipas tij, “ngritja e këtij komisioni është e domosdoshme”.

“Do të bëjë një analizë të plotë të situatës. Mendoj se nëse ky Parlament do të ketë një komision ku ne duhet të jemi në sinkron, është ky komision ku duhet të japim një analizë të detajuar se në cilin nivel ka shkuar ndërhyrja e këtyre vendeve. S’mund të jemi ne imunë kur nuk është SHBA apo vendet e BE. Është në nderin tonë ta adresojmë sa më parë. Jam i bindur se ju do t’i bashkoheni këtij komisioni”, deklaroi Çuçi.

Fraksion.com