Nesër temperatura deri në 30 gradë në vend, çfarë sjell java e re

Ditë verë parashikohet të jetë e hëna në vendin tonë. Termometri  sipas shërbimit “Meteoalb” pritet të  shënojë vlera deri në 30 gradë celsius. Masat ajrore me orgjinë nga Afrika të pranishme në Evropë bëjnë të përjetojmë temperatura  të  pazakonta për muajin.

“Maksimumet kanë arritur 6 gradë celsius më lart se normalja e prillit. Dita e hënë do të sjellë një tjetër rritje me të paktën 2 gradë celsius të temperaturave të ajrit duke bërë që të kemi maksimume në zona të izoluara mbi 29 gradë celsius. Këto temperatura te larta të ajrit vijnë si pasojë e masave ajrore që vijnë nga Afrika të pasura me prezencë të lartë të grimcave të rërës.”– njofton “Meteoalb”.

Ajri pritet të pastrohet të martën nga rëra, por toka do ndotet për shkak të reshjeve me baltë që pritet të bien.

“Mbrëmjen e të hënës presim shtim të lagështirës në territorin shqiptar çka do të bëjë që grimcat e rërës të pasurohen me lagështirë, të fitojnë peshë e të bien drejt tokës duke bërë të kemi shi balte. Do të jetë një episod mjaft i shkurtër në orët e vona të së hënës e mëngjesin e së martës”– thuhet në njoftimin e “Meteoalb”.

Me largimin grimcave të pluhurit  me orgjinë  nga Afrika  në ajër parashikohet dhe stabilizim i temperaturave.

Problematike gjatë të hënës parashikohet të jetë era, e cila në det të hapur pritet të shkojë  mbi 75 km/orë. Intensitet që  sipas meteorologëve pritet të ulet të martën.

Fraksion.com