Rama: Tirana do të jetë kryeqyteti europian i gjithë rajonit

Kryeministri Edi Rama ndau sot pamje nga kryeqyteti shqiptar, Tirana në fillim të viteve ’90 dhe transformimet rrënjësore që qyteti ka pësuar këto 30 vite.

Në një video të publikuar në eventin “Tirana nga ajri”, Rama shprehet se, “kush nuk e ka jetuar Tiranën e prag viteve 2000. Nuk ka si beson që këto foto janë kryer rrugëve të saj në atë kohë”.

“Sheshi “Skënderbej”, dikur hapësirë bosh që mbushej vetëm për manifestimet e mëdha të diktaturës së proletariatit, kthyer në një boshllëk të zymtë, ku lypsat laheshin në shatërvanët e vjetër”, thekson Rama.

“Lana, e zhdukur mes dy trenave të gjatë godinash të ndërtuara pa leje, ku derdheshin e hidheshin plehrat që kalbeshin në erën e saj kutërbuese, e cila kur binte shi fryhej e dilte nga shtrati për të përmbytur rrugët”, shton Rama.

“Veturat e vjetra azmatike që shtoheshin në një trafik të rrëmujshëm, ndërkohë që autobusët urbanë plakeshin duke mbushur kolonën zanore të qytetit me grahma të tyre të fundit”, nënvizon Rama.

“Gjëja e gjallë therej e shitej në kthina e kthesa lagjes, ku hidhej shtresa e parë e sipërmarrjes së vogël”, thotë Rama.

“Spitalet, shkollat godina të vjetra të institucioneve e dyqanet ishin shembëlltyrat evropiane të botës së tretë”, shprehet Rama.

“Qyteti rrethohej nga ardhacakët e periferive të Shqipërisë në kërkim të Amerikës së tyre të vogël, të cilët ngrinin shtëpitë tyre me paratë e familjarëve në emigracion”, shton Rama.

“Këto pamje u nxorën për këtë shfaqje nga koleksioni i fotografit amator Carlo Kuhni, i cili jetoi disa kohë në Shqipëri, ndërkohë që koleksioni i asokohshëm i Alket Islamit u dogj në një aksident fatal dhe nuk ekziston më”, shton më tej Rama.

“U zhdukën asisoj dhe plot dëshmi të marra nga ajri në vitet e para 2000, kur nisi rilindja e Tiranës së sotme, e cila 10 vjet nga sot do të jetë kryeqyteti i Evropës së Ballkanit”, përfundon Rama.

Fraksion.com