“Atë kohë çdo gjë u prish”, ish-këshilltari i Leka Zokut: Princit i gjetëm nuse vajzën e Rugovës

Ish-këshilltari i Oborrit Mbretëror, Murat Basha, i ftuar në emisionin Top Story, tha se gjatë kohës që Mbreti Zog Leka I ishte gjallë, planifikuan të gjenin një partnere për Princin. Duke iu referuar edhe rregullores së Mbretërisë Shqiptare, Basha tha se ata e panë të arsyeshme që Princ Leka të njihej e më pas të martohej me vajzën e Ibrahim Rugovës. Por kjo gjë nuk u realizua sepse më pas rrethi i ngushtë i Mbretit, mori vesh që Princ Leka dashuronte Elia Zaharinë.

“Ne që punonim afër Mbretit u kujdesëm që ky djali të kujdesej edhe për të ardhmen. Të mendonte për jetën e të sistemohej. Siç e ka edhe statusin themeltor i Mbretërisë Shqiptare është që Mbreti nuk mund të martohet me një vajzë shqiptare, se personifikon babain e kombit dhe babi nuk mund të martohet me vajzat e tija. Ahmet Zogu mori Geraldinën, Mbreti Leka- Suzanën nga mbretëria australiane, por me ndryshimin kohëve edhe kjo po ndryshon.

Nga njerëzit e ngushtë të Mbretit Leka menduam që t’i krijonim Princit projektin për një të ardhme, me një vajzë me origjinë shqiptare, por që nuk jetonte këtu. Bëhej fjalë për vajzën e Ibrahim Rugovës. Kjo do të bënte një gjë shumë të bukur. E kanë menduar edhe të tjerët, ishim dakord një pjesë, por ne nuk ishim në dijeni që Princ Leka ishte në një marrëdhënie. Atë kohë çdo gjë u prish dhe unë e kam përgëzuar Princin Leka se ndoqi zemrën e tij”, tha Murat Basha.

Fraksion.com