Baza e NATO-s në Kuçovë, Tabaku: Dëshmi e rëndësisë strategjike të Shqipërisë dhe rolit tonë në Aleancë
Deputetja e PD-së, Jorida Tabaku deklaroi sot se inaugurimi i bazës së NATO në Kuçovë është një dëshmi e rëndësisë strategjike të Shqipërisë dhe rolit tonë në këtë aleancë.
Në një postim në rrjetet sociale, Tabaku shprehet se “sot shënjojmë një ditë të rëndësishme për Shqipërinë ndërsa festojmë 15 vjetorin e anëtarësimit të vendit në NATO me hapjen e bazës ushtarake në Kuçovë. Një dëshmi e hapit të rëndësishëm historik të ndërmarrë 15 vite më parë që shënjoi një herë e mirë ndryshimin gjeostrategjik të NATO-s me anëtarësimin e vendit tonë por edhe forcimin e sigurisë sonë kombëtare, lirisë dhe demokracisë”.
Ajo thekson se është një hap i rëndësishëm për forcimin e aleancës sonë në një kohë të vështirë që po kalon bota me agresionin e Rusisë ndaj Ukrainës dhe situatën në Lindjen e Mesme si dhe e konsideroi një simbol i besimit që partnerët strategjikë si SHBA kanë ndaj shqiptarëve dhe Shqipërisë.
“Por ky nuk duhet të jetë thjesht një hap krenarie dhe të mbyllet me kaq. Detyra jonë mbetet për të përmbushur dhe për të forcuar edhe më shumë sigurinë kombëtare dhe atë kibernetike duke ndryshuar qasjen tonë ndaj forcave të armatosura. Besimi që NATO na ka dhënë duhet shpërblyer në investime reale dhe mirë funksionimin e forcave tona të armatosura duke rritur eficencën tonë në fushën e sigurisë ushtarake dhe jo vetëm”, deklaron Tabaku.
Sipas saj, duhet të jetë një moment jo vetëm festimi por njëkohësisht edhe ripohimi të angazhimit tonë për të kontribuar pozitivisht në sigurinë tonë dhe vlerat demokratike që janë aq shumë të rëndësishme për Aleancën e NATO. “Qartësisht beteja që po zhvillohet në Ukrainë është ajo mes një demokracie dhe një autokracie”, shprehet deputetja Tabaku.
Fraksion.com
