“Vrasje me porosi të Ervis Martinajt”,anëtar i grupit të Bajrave, Denis Brajoviç arrestohet në Emiratet e Bashkuara

Denis Bajri është arrestuar në Emiratet e Bashkuara. 36-vjeçari ishte shpallur në kërkim ndërkombëtar në kuadër të megaoperacionit “Metamorfoza”.

Ai akuzohet nga SPAK për vrasjen e Gjin Ndojit, kryer më datë 9 gusht të vitit 2020 në Shkodër. Arrestimi i Bajrit u bë i mundur falë bashkëpunimit mes Policisë së Shtetit dhe zyrave të Interpolit. Denis Bajri pritet të ekstradohet në Shqipëri ku do t’i nënshtrohet gjykimit të drejtësisë.

Ervis Martinaj ka pasur rolin e porositësit për vrasjen e shtetasit Gjin (Borici) Ndoj duke kontraktuar shtetasin Behar Brajoviç dhe lidhjet e tij. Në këmbim të vrasjes së Gjin Ndojit, Ervis Martinaj do të realizonte vrasjen e Kleant Musabelliut. Nuk dihet shkaku se pse Martinaj e donte të vrarë Gjin Ndojin.

Pëllumb Gjoka ishte ai që pajtoi Behar Bajrin për ekzekutimin e Ndojit në Shkodër. Bajri ia la për ta kryer porosinë e vrasjes Denis Bajrit. Behar Bajri dhe Ndoji ishin miq në atë kohë dhe pas vrasjes Bajri shkoi edhe në varrim. Ndërsa vrasjen e Musabelliut e kërkonte Pëllumb Gjoka, pasi kishte tentuar ta vriste këtë të fundit në vitin 2017. Mirëpo kjo vrasje nuk u realizua.

Policia e Shtetit

Informacioni i siguruar nga strukturat e Policisë së Shtetit dhe i shkëmbyer në kohë reale me partnerët në Emiratet e Bashkuara, mundëson lokalizimin dhe kapjen e një shtetasi të kërkuar ndërkombëtarisht, në kuadër megaoperacionit “Metamorfoza”.

Finalizohet nga Policia në Emiratet e Bashkuara, operacioni policor i koduar “Rishtas”.

36-vjeçari i ndaluar, i akuzuar nga SPAK, për vrasje.

Në vijim të punës së pandërprerë, me objektiv lokalizimin, kapjen dhe vënien në pranga të shtetasve të shpallur në kërkim, strukturat e Policisë së Shtetit kanë siguruar informacion se një shtetas i shpallur në kërkim ndërkombëtar, për vrasje, fshihej në Emiratet e Bashkuara.

Ky informacion i shkëmbyer menjëherë me partnerët, nëpërmjet koordinimit të zyrave të Interpolit, ka mundësuar finalizimin në Emiratet e Bashkuara, të operacionit policor të koduar “Rishtas”, gjatë të cilit u bënë të mundur lokalizimi, kapja dhe vënia në pranga, me qëllim ekstradimin në Shqipëri, e shtetasit D. B., 36 vjeç, lindur në Shkodër.

Ky shtetas është i akuzuar nga SPAK, në kuadër të operacionit policor të koduar “Metamorfoza”, pasi dyshohet si autor i vrasjes së shtetasit Gj. B. (N.), kryer më datë 09.08.2020, në Shkodër.

Vijon bashkëpunimi për të kryer ekstradimin e këtij shtetasi, në Shqipëri.

Fraksion.com