Lajçak: Normalizimi i raporteve Kosovë-Serbi, nevojë urgjente

I dërguari i Bashkimit Evropian për dialogun Kosovë-Serbi, Miroslav Lajçak, po qëndron në Romë të Italisë, prej nga njofton që çështja e negociatave Kosovë-Serbi, ishte pjesë e diskutimit në disa takime me zyrtarë italianë, njofton KosovaPress.

Duke dhënë sinjale sinjale paralajmëruese për hapat që do të bëhen në këtë proces, Lajçak ka bërë të ditur se me zyrtarët italianë, kanë theksuar nevojën urgjente të normalizimit të raporteve mes të dyja vendeve.

“Diskutuam për zhvillimet e fundit në dialogun për normalizimin e marrëdhënieve ndërmjet Kosovës dhe Serbisë, çështjet më të gjera rajonale dhe hapat e tjerë në muajt në vijim”, ka shkruar ai në Facebook.

Emisari evropian nuk la pa përmendur as Konferencën e Sigurisë që u mbajt në Munih javën që shkoi.

“Kam marrë pjesë në ngjarje të shumta të fokusuara në Ballkanin Perëndimor, duke përfshirë një panel diskutimi publik për të ardhmen e Ballkanit Perëndimor, ku theksova nevojën urgjente për normalizimin e marrëdhënieve ndërmjet Kosovës dhe Serbisë”.

Sipas Miroslav Lajçakut, ky normalizim është thelbësor për stabilitetin e rajonit, zhvillimin ekonomik dhe përparimin drejt Bashkimit Evropian./KosovaPress

Fraksion.com